Shillong, Naiwieng 16: U Chief Executive Member jong ka KHADC u bah Titosstarwell Chyne mynta ka sngi u la ong ba ki Bank kila sdang ban pan ia ka “Pan Card” na ki dorbar shnong haba ki leit ban plie lane ia kiba la don ia ka akkunt ha ki bank.
Na ka liang jong u CEM u la ong ba na ka liang jong ka KHADC kan sa pynmih ia ka jingpynbna na ka KHADC ha kaba kin sa phah sha baroh ki Bank ba kat kum ka ain kim dei ban ban ia ka Pan Card na ki dorbar shnong. Ka dei ban iathuh ia ka Sanad ha kaba ia dei bad ki dorbar shnong.
Haba ia dei bad ki jingjia ha kine ki khyndiat sngi ha kaba kala don ka jingkynnoh ba ka jingshim pisa haki khynrdop ka long kaba la palat ia kaei kaba ka EC kala buh ha ka por ba ai wai ia ki khyrdop, halor kane ka EC ka ai ka jingmaham ia ki nongshim wai ba lada lap nangne sha khmat ka EC kan leh da kaba tygneh.
Na ka liang jong ka EC kan leit ruh ban jurip kyndit kyndit ia kine ki khyrdop bad la ong ba kine ki khyrdop kin peit bha ia baroh ki trok kiba kit beain ia ki dieng ki bym don TP, lada lap ia kum kine ki kali ki ophisar ki dei ban kurup noh ia ki, ki ophisar kim dei ban ia don kti ha kum kane ka kam bad lada lap ka ophis kan shu weng kam beit shipor namar ka EC kan nym lah ban shah ia kum kine ki jingjia.
La ong ba kum kaba ka paw haki lat pathai khubor ka seng nongniah trok kila kynnoh ba kala don ka jingshim tam bad la bthah ba ia kito kiba la dep ban ai slip ym dei shuh ban shim ia ka bai khrong. Kumba ka ka jingioh jong ka EC na kane ka jinglum na ki khyrdopha ka shisnem ka long kumba 20 lak ei ei ha ka shisnem.
Haba ia dei bad kane ka jingkynnoh ba ka don ka jingshimtam na ka liang jong ka seng Trok Association kam shym la ujor sha ka Council ban ong ba kila shah shim shihajar kawei ka trok hynrei na ka liang jong ka EC haba ka iohi kum kine ki jingshah kynnoh la shaim khia bad la aiti hapoh ka tnad khlaw ba peit ia kaba don kam.
Haba ia dei bad ka Arrear ka EC kala pynkhreh ban sniew ia kane ka pisa sha ki nongtrei shuwa ka Khristmas ka jinglut kan long katno ia kane dang shim ia ka jingkhein mynta bad na ka EC ka pynkhreh ba kan siew 30 % ei ei lada lah,ha kaba ia dei bad kane ka EC kam pat shim ia ka rai namar mynta ka dang don ha ka jingpynkhreh.
