Shillong, Jylliew 27: Ka Sorkar Jylla kala kular ban ai ka jingkyrshan ba pura ia i meirad bala 76 snem ka rta Kong Kmoin Wahlang, ka ban leit mihkhmat ia ka Ri India sha ka jingiakop mareh marathon jong ka Pan Pacific Master Games, 2024 ka ban long ha Gold Coast, Australia.
U Myntri ka tnad ialehkai Sports ka Jylla u Bah Shakliar Warjri mynta ka sngi ka 27 tarik u Jylliew 2024 ula leit ban synran ia kane ka meirad ban iakynduh ia u Myntri Rangbah ka Jylla Conrad K Sangma ha Meghalaya Secretariat.
Haba iakren bad ki nongthoh khubor na ka laing u Bah Shakliar Warjri ula ong ba kumba kila iohi lyngba ki latpathai khubor baka Kong Kmoin Wahlang kan ioh ban leit mihkhmat ia ka Ri India ha Australia, ha kaba kan leit ban iashimbynta ha ka jingiakop mareh marathon ba 10 Km, 5 Km, 3 Km, 1.5 km bad 500 meter.
U la ong ba nga laleit ban iakynduh marmet ia I bad u Myntri Rangbah ruh ula kwah iakynduh markhmat ia i ban kular ia i ba ka Sorkar ka don hangne ban iarap. U la ong ba na ka liang ka sorkar ka la kitbok ia i bad kyrmen ba kan ioh ban wanrah takma ym tang ia ka Jylla hynrei ia ka ri baroh kawei.
Haba kylli ia ka jingsngew jong u halor ka jingleit mihkhmat I Kong Kmoin shabar ka Jylla, u Bah Shakliar ula pynpaw Nga ngeit ba kala pynsngew sarong ia ka Jylla baroh kawei ban iohi ba ka longkmie ha ka rta jong i, 76 snem ka rta, in iashimbynta ha ka iakop mareh ba 10km.
Ka dei ka khyllipmat ba sngew sarong ia ka Jylla bad ka Ri. Ngi sngew kmen ha bad kitbok ba in ioh ka met ba koi ba khiah bad ka jingkyrkhu u Blei ha ka lynti iaid jong ka.
Ka kong Kmoin Wahlang, uba ju iashimbynta ha ki jingiakop mareh ia ka lynti kaba jngai, ila shah khot ban iadonlang bad ka kynhun ka India na ka bynta ka 13th Pan Pacific Master Games 2024, ka ban long ha u Naiwieng ha Queensland, Australia.
Ka jingshah jied jong i kala urlong da ka jingiakop mareh ba pyniapbiej ia baroh ha ka lympung ba long haba sdang une u snem ha Hyderabad. ka Kong Kmoin ka ban iashim bynta ha ka iakop mareh ba 800m, 1500 m, 3000 m ha ka thup ki nongiamareh ba 75 snem shajrong, ila pynpaw ia ka jingkmen hadien ka jingiakynduh ia u Myntri Rangbah ka Jylla bad u Myntri kam ialehkai.
Ka kong Kmoin ka kyrmen skhem ba kan ai mynsiem iaka pateng ban wan bad ai khublei ia ka Sorkar halor ka jingai jingkyrshan. “Nga kymen ban ioh khur medal shabar ka Ri bad wanrah nam ym tang ia ka Jylla hynrei ia ka Ri baroh kawei”.
