Shillong, Jylliew 03: Ka Institute of Bioresources and Sustainable Development (IBSD) kala lah ban pyndep ban tei ia ka jaka buh syntiew kaba lah ban pynneh ia shibun jaid ki syntiew ki skud katkum kane ka juk kaba mynta ia kaba la shna ha Upper Shullong ia kaba la tip kum ka “Orchidarium”.
U Prof. Dinabandhu Sahoo, Director IBSD, haba batai ha ki lad pathai khubor mynta ka sngi u la ong ba kane ka jaka buh syntiew ka long kaba nyngkong ha India ba kan don ia ki syntiew kiba phuh baroh shisnem lynter ba kane ka jaka ka long katkum ki jaka buh syntiew kiba don ha kiwei ki ri jong ka pyrthei.
La iathuh ruh mynta ki plie ia kane ka jaka buh syntiew na ka bynta ki paidbah ban kin wan ban jngohkai ia kane ka jaka khlem da don kano kano ka jingsiew, hynrei la bethah ruh ia kiba leit ban peitkai ba kim bit ban ktah ia ki syntiew kin shuh peit bad ki lah ban shon dur ia ki.
La ong ba ha ka Ri India baroh kawei ka dong shatei lam mih ngi jong ka Ri India ka don ia ki symbai syntiew kiba bun jaid bad kane ka thain ha don ha duh 876 jait ki syntiew. La ong ba mynta ki dang ai jinghikai ia ki samla khlem kam ba kin shah hikai ha kane ka jaka ba kin dup lah ban thung ia ki syntiew bad kan long ka lad kamai na ka bynta jong ki.
Kumba ka long mynta ka iew die syntiew ha ka pyrthei ka long kaba heh haduh katta katta bad wat ka Ri India ruh ka dang thied ia ki syntiew na kiwei ki Ri Jong ka pyrthei. Ha kane ka sngi la batai sha ki lad pathai khubor ia ka jingmyntoi na ka rep syntiew bad katei ka jaka kan long ka jaka jngohkai pyrthei na ka bynta ki ba wan na shabar bad kum juh ia kiba na kane ka jylla.
