Shillong, Naitung 28: Ka KSU South West Khasi Hills District lyngba ka kyrwoh na u samla Forwardman Nongrem, President KSU South West Khasi Hills District, ka kwah ban kren shai sha ka sorkar India ba ai kan iaid shwa lyngba ka snam ne lyngba ki metiap hynrei ka KSU kan nym ailad ban tih ia u marpoh khyndew uranium.
Kane ka rai ka long hadien ba kila iohi ba ” ka sorkar India kam pat sangeh ban pyrshang ban tih ia u Uranium hapoh Mawthabah Domiasiat bad kiwei kiwei ki bynta South West Khasi Hills District” katba kum ka jubab jong u Dr. Jitendra Singh , Myntri ka sorkar pdeng ha ing Dorbar Lok Sabha ha ka sngi balang.
Ka seng ka kwah kren shai sha ka sorkar Jylla bad ka sorkar India ba da leilei ruh em kin nym ailad ban tih ia u Uranium, ” Ngi la long kiba la kloi ban ia umsnam, ban tur na ka ding ne naka snam bad wat ban rah atiar ruh lada ka dawa iangi ban leh kumta bad lada ki bor sorkar ki mut ban Thom da ka bor halor kane ka bynta”. La ong u President ka KSU SWKH District.
Ka seng KSU kala iohi ba ka sorkar India ka la pyni bad aidak halor kane ka bynta hynrei ka seng ka ong ba ka dak kaba rit kan pynpluh iaki mynsiem jong ki samla ka Jaitbynriew bad ia ka dong ka thain bad lada kan mih ka jingiaklumar hapoh ka District ka sorkar ka dei ban shim iaki jingkitkhlieh.
Shuh shuh ha kawei ka liang ka seng ka pynrem jur iaka sorkar MDA kaba shu kohnguh katba ong ka sorkar pdeng ha kane ka bynta, ka seng kala juh krem man ka por ba ka sorkar kala dei ban shim noh ia ka rai hapoh ka iing dorbar thawain ka jylla ban khylliapnoh ia kane ka phang tih Uranium balei kam leh ei ei.
Ka KSU kala kren iaka sorkar Jylla ban rah sha ka Ministry of Environment Forest and Climate Change ( MoEF &CC) ba dei ban phah weng noh iaka jingbit halor ka kam tih Uranium ha Domiasiat bad ha Mawthabah ia kaba la ai naduh u bnai Nohprah 2007 nalor kiwei kiwei pat ki Jingbit ba kane ka Ministry ka la ai naka por sha ka por ha kiwei kiwei ki jaka ban ksam uranium, hynrei kaei ka sorkar MDA kala leh.
Ka seng ka kren shai ruh ia kino kino ki briew sorkar ne briew shimet ba wan mushlia ha kito ki thain kiba wan pynbiej bad ialam bakla iaki paitbah kato ka thain da kaba ki kwah ban ong ba ” Ka por ka dang biang ba phin kylla kaba mut noh hashwa ba ka Jaitbynriew kan nym map shuh ia ki kam ba ki ki leh ne hashwa ba ka por kan dier iaki ba ngin pdiang iaki jingkylla bamut jongphi ”
Ka seng ka kwah ban ban biang bad ban ai ka khubor kaba shai ba ka jingpyrshah jong ki halor u Uranium ka khlain bad kan nang iai khlain, ka nongrim pyrshah uranium ka dang skhem bad kum ki dkhot ka seng ki la pynkhreh lypa ban ia tyngkhuh kampher la ka long ha kano kano ka dur, long ong u samla Forwardman Nongrem, President KSU South West Khasi Hills District ha ka kyrwoh mynta ka sngi.
