Shillong, Jymmang 18: Halor ka jingialang jong baroh ki seng saiñ pyrthei ba la khot da ka sorkar MDA lashai ka sngi ban iatai halor ka roster system, ka KSU ka kwah ban pynpaw kumne harum:
Ka jingmih jong ka Roster System kumba paw hi ka dei namar ka jingbthah ka High Court of Meghalaya ia ka sorkar jylla. Hynrei kaba sngewsih pat ka long ba ka sorkar jylla haba pyntreikam ia kane ka Roster System ka la kyrtiang biang shadien da kaba wanrah ia ka jingbym biang ioh kam ki Garo katkum ka bhah 40:40.
Katkum ka jingujor katto katne tylli ki kynhun seng bhalang na Garo Hills, bad bsut ia kane ha ki jingthung kam kiba mynta kiba la ktah shibun eh ia ki samla wad kam Khasi namar ka jingioh bhah ki Khasi mynta kam dei shuh 40% hynrei ka la hiar shuh shuh.
Hooid lada kheiñ wat na ka ‘ jingdon ki briew ‘ ruh ka bhah 40:40 ka la pynduh nong bha ia u Khasi namar ka Jaidbynriew Khasi ka kham heh paid ban ia ka Jaidbynriew Garo hynrei ka jingkyrtiang dien ia ka roster system ka la buh jingeh arshah ia ki samla Khasi ba mynta namar kim ioh pura shuh wat tang ia ka bhah 40%.
Ka KSU ka kyntu ia baroh ki politicians Khasi ba ki dei ban pyrshah beit ia ka jingpynphai dien ia ka roster system bad dawa ba dei ban pyntreikam beit shakhmat ia ka Roster System.
Shuh shuh lada ka sorkar ka sngew ba ka jingphai dien ia ka Roster System ka dei ban pyndap ia ka jingduhnong ki Garo naduh u snem 1972, ka long pat kum ka jingpynshitom, jingpynsaja bad jingtei pop ia ki samla Khasi kiba wad kam mynta.
Tang namar ba phi sngew ba kib mynshwa ki la bakla ym dei pat ban pynshitom (punish) ia ki samla Khasi mynta kiba luilui ki bym don bynta eiei ha ki jingjia ba mynshwa hynrei kiba kwah tang ban ioh ia la ka hok ka bhah ha ki kam sorkar.
Ka KSU ka dawa na ka sorkar MDA ba ia ka Roster System dei ban pyntreikam sha khmat naduh ba la pynmih ia ka bad ym ban phai shadien kaba long kum ka jingiohnong ia kawei ka Jaidbynriew bad ka jingduhnong kaba khraw ia kawei pat ka Jaidbynriew. Kane ka long katkum ka kyrwoh kaba la phah da u samla Donald V Thabah general secretary ka KSU.
