Shillong, Naitung 02: Ka Khasi Students’ Union (KSU) lyngba kane ka kyrwoh ka pyntip ba ka la ioh jingtip ba don ki riewshimet bad ki kynhun kiba la leh bad thmu pyndonkam bakla ia ka kyrteng ka seng, ka shap ka seng bad ka kyrteng ka nam ki nongialam barim ka seng na ka bynta ka myntoi shimet ka jong ki.
Ka seng ka buh ka jingmaham ia kum kine ki briew bad ki kynhun ba lada ki leh tamti tamjat ban pyndonkam bakla ia kitei haneng na ka bynta ka nam ka burom malade kan ym artatien wat ban pyni da ka bor met ruh pyrshah ia ki.
Ka KSU ka kyntu ia ki khun ka Bri U Hynñiewtrep ban ym shah ialam bakla bad shah pynthame ha kino kino ki briew lane kynhun bad wat ki sengbhalang kiba leh mynleh ieid Jaidbynriew tang na shynrong hynrei napoh napoh pat ki dei tang ki dalal jong ki bor sorkar, iarmangkalai bad mynder rie.
Kine ki kynhun ki dei kita ki suri kup snieh langbrot kiba leh ieid Jaidbynriew tang ban ioh nam bad ban pynjah kyrteng ia ka KSU kaba la ieng skhem triang la 46 snem mynta ban long ka kynroh kaba skhem jong ka Jaidbynriew Khasi.
Ki paidbah ki lah ban sakhi ruh ba lada don kino kino ki mat kiba ka KSU ka ju shim na ka bynta ka bha ka miat u paid Khasi, kine ki kynhun ki ju mih kynsan kynsan ha kum kita ki por ban shim pat ia kiwei ki mat tang ban pyntlot noh ia ki mat kiba la shim ka KSU (overshadow).
Ki paidbah ki lah ban bishar ba lada leh eiei ka KSU wat tang ki mat kiba rit ruh, ki dkhot kin shah kem beit khlem daw kumba la paw ba haduh mynta 5 ngut ki dkhot ka seng ki dang shong saja ha byndi kiba kynthup ruh wat ia 2 ngut ki nongialam na ka CEC. Hynrei ki dkhot jong kum kitei ki seng kim ju shah kem ha ki bor pulit kaba pyni ba lehse ioh don kaei kaei (nexus) sha lyndet.
Kyntang ia wai ka *KSU ka maham biang ba ym bit ban leh kino kino ki kam kiba ia dei bad ka seng KSU kaba mynta bad mynshwa lane bad ki nongialam ba mynta bad mynshwa khlem da ioh jingbit na ka CEC jong ka KSU, kane ka long katkum ka kyrwoh kaba la phah da u General Secretary ka seng u samla Donal V Thabah.
