Shillong, Naitung 25: U Bah HS Shylla CEM jong ka KHADC mynta ka sngi u la wanrah hapoh ka iing dorbar thawian jong ka KHADC ia ka jingkwah ban pynkylla ia ka “Khasi Hills Autonomous District(Khasi Social Custom of Linage) (Second Amendment) Bill,2018.
Kane ka jingpynkylla ka long ia ka Section 3 jong katei ka ain bad kane ka jingkylla la thoh ha ka ktien phareng kumne “(d) Any Khasi Women who marries a Non Khasi as well as her offspring(s) born out of Such Marriage(s) shall be deemed as Non-Khasi who shall lose the Khasi status and all privileges and benefits as a member of the Khasi Tribe who cannot claim preferential privileges under any law”.
Haba pynwan sha ka ktien khasi ia kane ka jingkwah ban pynkylla ia katei ka ain ka long, “ Kano kano ka kynthei khasi kaba ioh lok da u bym dei khasi, ki khun kiba khan a kane ka jingiashong kurim ruh yn niew ia ki ba kim dei shuh ki khasi, kine kin duh noh ia ka jinglong khasi bad ia kiwei kiwei ki jingioh kum ki khasi, kine kin nym lah shuh ban kam ia ka bynta ka jong ki hapoh jong kano kano ka ain”.
Haba wanrah ia kane ka Bill ban pynkylla bad pynrung pat ia katei ka kyndon, na ka liang jong u Bah Shylla u la ong ba ia kane ka Bill la wanrah ha u snem 1997 bad la long ain mynta. Ka jingwanrah ia kane ka jingpynkylla ka long ba ka jaid bynriew ka don ha pdeng ka jingma kaba khraw bad ki jaid bynriew ba shim jaid na ka kmie dei tang ki khasi bad ki Garo ha kane ka sla pyrthei.
U la iathuh hapoh ka iing dorbar ba ha u snem 1978 ka sorkar jylla kala wanrah ia ka Land Transfer Act ban khanglad ia ka jingiadie ia ki jaka sha ki briew kiba khraw, hynrei kine ki briew ban ioh ia ka jaka ki shongkha da ki Khasi bad ia kane la lap ha ka por ba leit ban khyndang Trading License haba ka kynthei khasi ka kam ba kane ka dei ka dukan jong ka bad u ba shong hangta u dei u lok jong ka, kane ka jingdei shah hiar thma kaba jar jar jong ka jaidbynriew khasi bad kum juh sha jaintia Hills.
U Bah Shylla u la ong ba ki briew kiba na bar ki shong khai ia ki briew jong ngi ban ioh thied khyndew bad ban leh bun ki kam khaii pateng, lada jia ba kine ki la bun paid kin ialeh pyrshah bad ha kata ka por kan don ka jingma kaba sherkhei , kumta shuwa ba kan poi kata ka por don kam ban iada da ka ain. Ia kane ka bill ynd ang ia tai hapoh ka iing dorbar bad yn pdiang ne kyntait kan long ha ka sngi thidieng la shi sngi.
