Shillong, Rymphang 12: Ka Meghalaya Board of School Education (MBOSE) ban kham pynsuk bad ban lait na ka jingpepskul ba shiteng por jong ki khynnah, ka la wanrah ia ka jingpynkylla ha ka ba ïadei bad ka rukom thoh eksam na ka bynta ki khynnah kiba thoh ïa ka eksam matrik ne ka Secondary School Leaving Certificate (SSLC), ha kaba kin ioh lad ban thoh pat ïa ki subject ki ba ki ‘fail’.
Ha ba ïoh ban ïa kren bad u Join Director ka MBOSE, Bah M Marbañiang u la ong ba kat kum ka notification ka ba la pynmih ha ka 30 tarik u Nailar 2024 ki pyntip ba na ka liang ka Board kan pynlong ïa artylli ki eksam na ka bynta ki khynnah ki ba ïa leh ïa ka eksam SSLC kata ka ‘Main exam’ bad ka ‘supplementary Exam’.
U Bah Marbañiang u la ong ruh ba ka jingpynlong ïa ka eksam na ka bynta ki ‘supplementary subject’ kan lah banlong ha u bnai ïaiong bad na ka liang ka MBOSE ka la dep ban pynkhreh na ka bynta kane ka eksam, kaba sah ka long tang ban dep noh kane ka ‘main exam’ ka ba mynta ka dang ïaid sha khmat.
Ha ka ba ïadei bad ka correction ïa ki papers na ka liang ka MBOSE kan ïaleh ban pyndep noh ha shwa ka taiew ba nyngkong jong u bnai Lber khnang ba yn lah ban pynmih noh ïa ka result ha poh ka taiew ba khatduh jong u Lber.
Ka jingwan rah ka Board ïa kane kalad na ka bynta ki khynnah ba kin ïoh ban thoh ïa ki supplementary subject ka long ba kan khanglad ïa ka jingpep skul ba shiteng por ki khynnah.
U la ong ruh ba kine ki khynnah ki ba shong klas 10 ki dei ki ba dang told ha ka bor pyrkhat- pyrdaiñ bad ba kin lait na ki jingsniew ki ban shah ïalam bakla.
U la ong ruh ba lada kine ki khynnah ki ban ïaleh ïa ki supplementary subject kin dep ha u bnai Ïaiong ka dang biang ïa ki ba kin sdang ïa ka klas 11 na duh u bnai Jymmang namar ba ka eksam na ka bynta ki klas 11 kan long ha u bnai kyllalyngkot.
