Tura, Kyllalyngkot 14: U myntri rangbah ka jylla Meghalaya u Conrad K Sangma mynta ka sngi u la plie ia ka jaka ban pynmih symbai ngap ha Sambrak ba dei hapoh jong ka North Garo Hills District ia kaba la tip kum ka Integrated Beekeeping Development Centre (IBDC).
Ia kane ka jaka ban pynmih symbai ri ngap la bei pisa da ka tnad jong ka sorkar pdeng kaba dei peit ia ki riewlum kaba la kot sha ka T.10 klur tyngka, kane ka dei ruh ka jingkwah jong u mytnri rangbah duh jong ka Ri India u Narendra Modi ban kyntiew ia ka ioh ka kot jong ki nongkyndong.
Ka sorkar pdeng ka ialeh ban pynshlur ia kane ka kam ri ngap lyngba ka skhim kaba la tip kum ka “Integrated Development of Horticulture” ia kaba la pynwan dur ia kane ka skhim da ka “National Bee Board” kaba dei kum ka nongpeit ban ri ngap katkum kane ka juk kaba mynta.
Haba kren halor ka jingangnud jong ka sorkar ban pynshlur ia kane ka kam ri ngap ha ka jylla u myntri rangbah ka jylla u Cornad K Sangma u la ong ba ka sorkar kala ia kren bad kiba bun ki riew shemphang ban kumno ban pynneh pynsah bad ban pynshlur ia ki kam ri ngap, la ong ba la dep ban hikai haduh 7000 ngut ki briew ban leh ia kane ka kam ri ngap da ka Meghalaya Institute of Entrepreneurship (MIE).
Ha ka jingkren paidbah ha ka jingialang mynta ka sngi u myntri rangbah u la ong ba ia ka jylla Meghalaya la niew ba ka dei kawei na ki dong bad ki thain ba biang bha ban ri ngap, hynrei namar bay m shym don ba pynsngewthuh ia kane ki nongrep kims hym la ioh ia ka jingmyntoi na kane ka kam ri ngap.
La ong ba ka jylla Meghalaya ka don ia la lat ba lah ban buh haduh san lak ki jaka ri ngap bad kumba ka long mynta ki don tang 16,728 tylli kaba mut ba ka dang long tang 3% da ka jingdon ia kane ka “ Integrated Bee Development Centre” ka lah ban pynkiew shuh shuh ia ka kam ri ngap ha ka jylla.
U myntri rangbah u la ong ba ka IBDC kan iarap kumno ban ri ngap katkum kane ka juk kaba mynta ban pynshlur ia ki paidbah jong ka jylla. Ka IBDC kan long kum ka jaka ai jinghiaki ia ki briew ha ka kam ri ngap, kane ka jaka ri ngap ka don hapdeng 20 bad 25 akar ka jingheh jong ka jaka.
Ha kane ka sngi la don lang ruh u Deputy Speaker jong ka jylla Meghalaya u Timothy D Shira, u MLA Rupert Momin, u Pongseng M Sangma bad kiwei kiwei ki heh sorkar jylla ban sakhi lang ia kane ka sngi.
