Shillong, Risaw 13: Ka Khasi Students’ Union (KSU) ka pynpaw ia ka jingsngew kmen halor ka jingshimkhia ka sorkar ban ia treilang lem ba ki nongialam niam ban rat dyngkhong ia u drok na ka jylla Meghalaya bad na ka Jaidbynriew Khasi.
Ka seng ka sngew ba ka jingiatreilang hapdeng ka sorkar, ki nongialam niam, ki nongsynshar shnong bad hima bad kumjuh ruh bad ki seng treimon sngewbha ka dei ka dak ban pyni ia ka jingsdang ban ia khun pyrshah ia ka jingwan rung u droks sha ka jylla.
Namar kumba ka long u drok u la rung pat ha ki khynnah skul bad samla haduh ban da pynjot thiaw ia ka jingim ka jong ki bad kaba ktah kylla pat ia ka iing ka sem ka jong ki, ka shongsuk shongsain bad ka imlang sahlang hi baroh kawei.
Ki nongialam ka KSU kiba kynthup ia u samla Lambok Starwell Marngar President, samla Biangbor Paliar Vice President, samla Donald V. Thabah General Secretary bad u samla Reuben A. Najiar Assistant General Secretary dang ha ka 6 tarik u Risaw 2023 ki la leit ban ia kynduh ia u symbud myntri rangbah, u Bah Prestone Tynsong uba dei peit ruh ia ka kam pohiing ha iing treikam jong u.
Ha kane ka jingiakynduh la iathir bad ia syllok janai bha halor ka jingbam pong u drok ia ka imlang ka sahlang bad kumno ban tehlakam ban pynduh jait shi syndon ia une u jingdih iakjakor.
Ki nongialam ka seng ki la pynpaw ia ka jingsngew bynniaw halor ka jingsynjor ka ain ban pynshtiom ia ki nongkhaii drok ha kaba wat kito kiba la snar bha ha kane ka kam ki kloi ban lait na phatok.
U samla Lambok u la pynsngew ruh ha u Bah Prestone ba ia ki nongdih hap khein kum ki nongpang bad ka donkam shibun eh ia ka sorkar ban seng ia ki jaka ai jingsumar lane kita ki Rehabilitation/De-addiction Centre ha man la ki shnong ha Sor Shillong.
U samla Lambok u la pynsngew ruh ba u drok mynta u la ksam wat shaduh ki shnong barit sha nongkyndong. Kumta u la kyntu ba ka sorkar ka dei ban buh ia kine ki jaka ai jingsumar ha baroh ki thain naduh ki kyrdan District, Sub-Division bad Block.
Ha kaba ia dei pat bad ki nongkhaii drok, ka KSU ka la ju lap bunsien ha man la ki shnong ki thaw ba haba ki dkhot ka seng lem bad ki nongsynshar shnong ki ju ioh kem ia kine ki snar khaii drok, la iohi ba tang da ki bnai lane taiew ki la lait na phatok bad ki la bteng biang ia kane kajuh ka kam.
Ka la don ka khep ruh ha South West Khasi Hills, ha kaba u nongkhaii drok u la ujor ejahar kylla pyrshah ia ki dkhot ka KSU haba ki kem ia u. ka KSU ka la pynsngew ba lada ka ain NDPS ka dang iai tlot bad synjor kumba long mynta.
Kane ka mut ka jingdih bad khaii drok kan kynrei palat shah namar ka jingtlot ka ain kan ai mynsiem shuh shuh ia ki briew ba na jylla bad khamtam kiba nabar jylla ba kin pynlong ia ka jylla kum ka ktem khaii bad dih drok.
Ka jingrung u droks lyngba ki bar jylla ka shyrkhei bha lyngba ka jingiohi na ki lad pathai khubor haba bunsien kiba shah kem ki dei beit kiba na shabar kumba la sakhi ha East Jaintia Hills. Na ka liang u symbud myntri rangbah ba ka tnad pulit lem ba ka tnad Social Welfare ki la ia treilang kumno ban the lakam ia ka jingdih bad khaii drok ha jylla.
U Bah Prestone u la pyntip ba la pynkha ia ka Advisory Committee ka ban bishar ia ki nongkhaii drok bad ka jingpynshitom kan ym long shuh tang da ki taiew ne ki bnai hynrei wat da ki bun snem ruh.
U la pyntip ruh ba ka sorkar kan sa ia syllok bad baroh ki nongialam seng treimon sngewbha, seng niam bad nongsynshar shnong ban pynduh jait ia ka jingdih drok ha jylla kaba la kylla sha ka jingbymshong shngain ka imlang ka sahlang lyngba ka tuh ka thiem, ka thok ka shukor bad ka lute.
U President ka KSU la pynpaw ruh ba ka sorkar ka dei ban khot ia ki nongaikhubor ban sakhi lang bad pyni paidbah haba ka tnad pulit ka thang ia ki drok ba la ioh kem ha kaba une u myntri u la kular ban bishar ia kane ka jingdawa.
Ki nongialam ka KSU ki la twad jingmut ruh halor ka MRSSA bad u Bah Prestone u la ong ba na ka liang ka sorkar jylla ka la ioh ia ka jubab na ka Ministry of Home Affairs (MHA), GOI halor kane ka mat. U Bah Prestone u la ong ba ka MHA kala ai lad ia ka sorkar jylla ban pynbit pynbiang bha ia ka MRSSA ha shwa ban pyntreikam pura ia ka ha jylla.
Ka KSU ka la buh jingkylli ruh halor ka mat Inner Line Permit (ILP) hynrei u Bah Prestone u la jubab ba ka dang sahkut sah ha ka sorkar pdeng. Khatduh ka KSU ka la pynsngew ba ynda la pyntreikam pura ia ka ILP ha Meghalaya kumba long ha Arunachal Pradesh, Mizoram, Nagaland bad Manipur, ka seng kan sa ia pynbeit bad ki paidbah bad sorkar halor ka mat railways.
