Shillong, Nohprah 20: Ka Mishon SSCC ka lahduh jong ka Super Division League Football Tournament 2024 ha Eastern West Khasi Hills ba la pynïaid da ka Pyndengumiong District Sports Association (PDSA), hadien ba ka la jop ïa ka jingïakhun final kaba la long mynta sngi Thohdieng, ha madan phutbol Dom Mawlum, Pyndengumiong.
Ka jingïaknieh namlahduh ka long hapdeng ka Mishon SSCC pyrshah ïa ka Thangmaw SCC, ha kaba baroh arliang ki la lah pynhun jrut da ka jingtbit jong ki ïa u paidbah u ba la wan sakhi ïa kane ka jingïalehkai.
Baroh arliang mamla ki la pynpaw ïa ki sap ba kyrpang jong ki ha kane ka jingïalehkai, kaba la pynhun ïa ki nongpeitkai da ka rukom lehkai ba i shongkun. Ka jingïalehkai ha ka kylla step ka la long kaba itynnad bha, ha kaba ka Mishon SSCC ka la lam khmat da kaba thep shi kol.
Hamar ba sdang ka kylla miet, ka Mishon Shows Dominance ka la lah ban tehlakam biang ïa ka jingïalehkai da kaba thep biang sa ar tylli ki kol katba ka Thangmaw kam shym la ïoh satia ban pynphai, ha kaba ka jingïalehkai ka la jam sha kaba kut da 3-0 kol.
Da kane ka namjop ka Mishon ka la long ka lahduh jong ka Super Division Division League 2024 bad ïohpdiang ïa ka khusnam pisa kaba T.60,000, katba ka kynhun kaba wan kyrdan ba ar ka la ïohpdiang ïa ka khusnam pisa kaba T 40,000 ryngkat ka trophy.
ïa kane ka jingïalehkai la wan sakhilang da u Bah Nongbri ADC jong ka EWKHD kum u kongsan ha ka jingïadonlang u Bah L.Myrthong AEC, MDC barim ka Mairang Konstitwensi, u Bah E.Nongrang-President ka PDSA, u Bah L.Nongrang, nangta ki Dkhot nongkitkam jong ka PDSA bad kiwei kiwei kiba la shah khot sngewbha.
