New Delhi, Iaiong 26: Ka kynhun myntri jong ka Sorkar Pdeng kaba khlieh da u Myntri Rangbah Duh, u Narendra Modi ka la ai jingmynjur ia ka polisi National Medical Devices, 2023 mynta ka sngi. Ki kam kiba iadei bad ki tiar ai jingsumar ha India ki long ka bynta kaba kongsan bad kan donkam ha ki kam aijingsumar jong ka India.
Ka bynta jong kine ki kam ka long kaba la kham heh haba ka India ka la ai jingkyrshan ia ka jingialeh pyrshah ia ka khlam COVID-19 hapoh bad shabar ri lyngba ka jingpynmih ia ki tiar ai jingsumar bad ki domestic kit kum ki Ventilator, Rapid Antigen Test kit, Real-Rime Reverse Transcription Polymerase Chain Reaction (RT-PCR) kit, Infrared (IR) Thermometer, Personal Protective Equipment (PPE) kit bad ki jingdakhmat N-95.
Ki kam shna tiar jingsumar ha India ki dei kiba dang sdang bad kiba dang kiewshaphrang ha ka rukom kaba stedbha. Ka iew ia ki tiar ai jingsumar ha India ka long kaba la antad ba la poi sha ka $11 billion (kumba, T 90,000 klur) ha u snem 2020 bad ka bynta jong kane ha ka iew tiar ai jingsumar jong ka pyrthei ka long kaba la antad ba la poi 1.5%.
Ki kam shna tiar ai jingsumar ha India ki dei kiba dang kiew bad ki don shibun ki lad ban long kiba lah ban pyndap ialade bad don bynta ha ka thong ban pynbiang lad ioh jingsumar ha kylleng ka pyrthei. Ka Sorkar India ka la dep sdang ia ka jingpyntreikam ia ka skhim PLI na ka bynta ki tiar ai jingsumar bad ka jingkyrshan ia ka jingseng ia saw tylli ki Medical Devices Park ha ki jylla Himachal Pradesh, Madhya Pradesh, Tamil Nadu bad Uttar Pradesh.
Hapoh ka skhim PLI na ka bynta ki tiar ai jingsumar, haduh mynta 26 tylli ki projek ki dei kiba la ioh jingmynjur bad ka jingkular ban bei tyngka haduh T.1206 klur bad na kane, haduh mynta, ka jingbei tyngka kaba T.714 klur ka dei kaba la urlong.
Hapoh ka skhim PLI, 14 tylli ki projek kiba pynmih 37 jait ki tiar ki dei kiba la sdang bad ka jingpynmih ia ki tiar ai jingsumar ha ka ri kum ki Linear Accelerator, MRI Scan, CT-Scan, Mammogram, C-Arm, MRI Coil, X-ray tube ba bha bad kiwei kiwei ki tiar, ka la sdang.
Ki 12 tylli ki tiar ba dang sah ki dei ki ban sdang ha kine ki por ban wan. San tylli ki projek na kine ki 26 tylli ki projek ki dei kiba la ioh jingmynjur dang shen hapoh ka Category B, ban pynmih hapoh ri ia 87 jait ki tiar.
Ban rah shakhmatia kine baroh, ka polisi ba pura ban pynsted ia ka jingkiew shaphrang bad pynurlong ia ki lad kiba don ha kine ki kam ka dei kaba donkam bha. Katba ki tnat Sorkar ki la sdang ia ki prokram ban ai mynsiem ia kine ki kam, kane ka polisi mynta ka thmu bad pynbiang ia ki kam kiba kongsan na ka bynta ka jingkiew shaphrang jong kane ka kam ha ka rukom treikam kaba ryntih.
Namar ka jingiar jong kane ka kam, ki kyndon, jingkyntiew ia ka jingai jinghikai ki dei kiba iahap bad ki tnat Sorkar Pdeng bad Sorkar Jylla bapher bapher. Ka long kaba donkam ban wanrah lang ia ki sienjam ha ka rukom kaba ryntih ka ban plié lad ia ka jingkyrshan ia kane ka kam da ki kynhun bapher bapher.
La khmih lynti ba ka National Medical Devices Policy, 2023 kan iarap ia ka jingkiew ryntih jong ka kam shna tiar ai jingsumar ban pynbiang ia ka jingdonkam jong ki briew, ha ka dor kaba jem bad da kaba pynbiang ia ki tiar kiba bha ha ryngkat ka jingsaindur thymmai.
La khmih lynti ba kane ka kam kan urlong lyngba kine ki rukom treikam kiba long ka jingpynbiang ia ki jinglong jingman kiba plié lad ia ka jingshna ia kine ki tiar bad ryngkat ka jingpeit bniah ia ka jingsaindur thymmai, ki kyndon kiba shai bad kiba skhem.
Ka jingpynbiang ia ki lad ioh jinghikai bad ka jingkyntiew ia ki kam pule puthi ba kin pynmih ia ki khynnah samla kiba don ka jingnang jingstad kaba iahap bad ki jingdonkam ha ki kam shna tiar ai jingsumar. Ka jingkyntiew ia ka jingbei tyngka napoh ri bad ka jingpynmih ia ki tiar ai jingsumar hapoh ri ki iahap bad ki prokram ‘Atmanirbhar Bharat’ bad‘Make in India’ jong ka Sorkar.
