Guwahati, Nailar 24: Ha kaba iadei bad ka jingshlei um namar ka jingther u lapbah ha Tripura, ka 1st Battalion National Disaster Response Force (NDRF) ka la pynlong ka jingleit pyllait ia ki lanot ha ka jingshlei um ha ka jylla naduh ka 20 tarik Nailar, 2024. Ka jingleit pyllait kalong ban ai jingiarap mar mar bad ai jingiarap ia kito kiba shah ktah na kane ka jingshlei um.
Ki don 11 tylli ki kynhun jong ki briew kiba la ioh jinghikai pyntbit, kiba rah lang bad ki lieng kiba bha, ki tiar ba pyndonkam haba rung shapoh um, ki tiar pyllait im ia ki briew ki la don ha ki jaka ba shah ktah jur.
Haduh ka 23 tarik Nailar, 2024, la ioh pyllait 1479 ngut ki briew na ki jaka ba shah ktah ha ka jingshlei um. Ki kynhun NDRF ruh ki la ai jingkyrshan ia ki bor pyniaid distrik ban sam ia ki tiar ai jingiarap sha ki briew kiba shah ktah, kaba pynthikna ba ki mar ba kongsan ki poi sha kito kiba donkam.
“Ka NDRF ka long kaba kloi ban ai jingiarap ia ki briew kiba don hapdeng ka jingeh, khlem da khein ia ki jingeh kiba ki dkhot ka NDRF ki hap ban iakynduh. Ngi kut jingmut ban pynbiang ka jingiarap bad jingkyrshan sha kito kiba shah ktah ha ka jingshlei um ha Tripura,” la ong u HPS Kandari, Commandant 1st Bn NDRF,uba don ha Tripura bad peit ia ka kam pyllait im ia ki briew.
