Shillong, Nailar 02: U Myntri rangbah ka jylla u la ong ba ia ka National Education Policy-2020 hap ban pyntrei kam namar kan long kaba bha ia ki samla pule, kumba ka long mynta ym don ba pyrshah ia ka.
U Myntri rangbah la ong haba pyntreikam ia kano kano kaba thymmai kan don ki jingeh bad kita ki jingleh ki long kum ki briew ban trei, ki jaka ai jinghikai kiba don kam mynta, bad ha ka por ba don jingkylla ki don la ki jong ki jingeh bad kim khmih lynti ruh ba kin iaid beit ki jingeh kin don.
Ia ki kolej ba dei jong ka sorkar, ka sorkar kan leh ia kaba don kam, ia ki kolej ba la ithuh da ka sorkar ka sorkar kan iai bteng ban ai ka jingkyrshan haduh katno lah ban leh, yn myn lah ban ong ba ka sorkar kan leh lut ia baroh, kito kiba pynaid ia ka ki kolej ki dei ban ia trei lang bad ka sorkar.
U Myntri Rangbah u la kren shai ba ki kolej sorkar dei kiba pyniaid da ka sorkar, ia ki kolej kiba la ithuh da ka sorkar ia ki la pyniaid da ki managing kommiittee bad ka sorkar ka ain ka jingkyrshan bad ki Adhok kolej ka sorkar ka shu ai ka jingiarap kyllem, ia kine ruh ka sorkar kan iarap.
Baroh ki kolej ki hap ban iaid sha khmat bad kane ka NEP-2020 la kaei ban long mynta ne ha dien ruh , ka NEHU kan sa ia kren bad ki kolej kiba pyniasoh bad ka NEHU bad kumba ka long ym don ba pyrshah ia ka NEP, baroh sngewthuh ba ka don ka jigneh haba don ka jingkylla.
Ki jingeh kan long kum ha ka liang ka pisa, ban shna ia ki kamra klass,kine ki long ki jingeh kumba ka long ka sorkar kan iarap ia kaei kaba ki lah ban leh, ban ong ia kano kano ka kolej kata ki hap ban ia kren bad ka tnad pule puthi namar ki samla ruh ki kwah ban iaid sha khmat.
