Shillong, Nohprah 09: Ka CoMSO mynta ka sngi kala ia kynduh ia u bah Metbah Lyngdoh President jong ka party UDP u ba dei ruh u shongknor jong ka iing dorbar jong ka jylla Meghalaya ban dawa ba ka sorkar ka dei ban pyntrei kam ia ka ILP ha kane ka jylla bad ban kren ia u Lat ban ai noh ia ka jingmynjur jong u halor ka Meghalaya Resident Safety and Security (Amendment ) Bill, 2020 kumba ka iing dorbar kala pdiang.
U shongknor jong ka CoMSO u bah Robertjune Kharjahrin haba kren ha ki lat pathai khubor ha dien ka jingiakynduh ia u President ka party UDP ka party kaba don lang ha kane ka sorkar MDA, u la ong ba ka jingiakren jong ki ka long ha ki ar tylli ki bynta kawei halor ka ILP bad kawei pat halor ka Meghalaya Resident Safety and Security (Amendment ) Bill, 2020.
Ha kane ka jingiakren na ka liang jong ka CoMSO kala pynsngew ha une u khliehduh jong ka party UDP ba ka jingdawa ban pyntrei kam ia ka ILP ha kane ka jylla kam dei tang ka kam jong ka sorkar marwei hynrei ka dei jong baroh ki 60 ngut ki MLA, ki MP bad ki MDCs bad ka dei jong ki paidbah ba ka Delhi kan tip ba ki paidbah ka jylla ki dawa ia ka ILP.
Haba ia dei bad ka MRRSA (Amendment) Bill, 2020 ka CoMSO kala ong ba kane ka dei ka kam jong ka sorkar jylla bad katkum ka article 200 ka long ba u Lat jong ka jylla u hap ban leh ia ka kam katkum ka jingai jingmut jong ka cabinet, katba ym pat ioh ia ka ILP la don kam ban ioh ia ka jingmynjur ia ka MRSSA (Amendment) Bill, 2020 ban iada ka jingwan ki briew kiba na bar sha kane ka jylla.
Haba ia dei bad kane ka pynsngew jong ka CoMSO na ka liang jong u bah Metbah Lyngdoh President ka UDP, u la ong ba un leit ban ia kynduh ia u Lat jong ka jylla ban ia kren halor ka MRSSA(Amendment) Bill, 2020 bad la ong ba ka party UDP kala dep ban thoh sha u Myntri Rangbah jylla ha kaba ia dei bad ka jingpyntrei kam ia ka ILP.
Na ka liang jong ka CoMSO ka kyntu ia ki paidbah ba kin iai bteng ia kane ka jingdawa ILP, ym dei ban long tang ki MLA, ki MDC, ki seng bhalang, hynrei ki riew shimet, ki dorbar hima, ki dorbar shnong ki seng samla shnong, ki seng kynthei bad kum juh ki dorbar kur ba kin dawa na ka sorkar ba dei ban pyntrei kam ia ka ILPha kane ka jylla Meghalaya.
