Shillong, Kyllalyngkot 30: Ka KSU Sanshnong Area Unit mynta ka sngi ka la pynlong iaka jingialang paitbah ha shnong Pyndenlyngdoh, South West Khasi Hills District halor ka jingdawa naka sorkar ban pyntreikam iaka Inner Line Permit bad halor ka jingpyrshah iaka Citizenship Amendment Act, 2019.
Ha kane ka sngi, la iadon ryngkat da u samla Pynshai Rani Asst. Education Secretary KSU Sengkmie , u samla Forwardman Nongrem President KSU South West Khasi Hills District, u samla Dusterwell K. Lyngdoh Organising Secretary KSU South West Khasi Hills District lem bad ki riewrangbah kynthup ruh iaki nongialam shnong jongka thain.
Haba kren haka jingialang u samla Samborlang Shabong Asst. Organising Secretary KSU South West Khasi Hills District u la kyntu iaki paitbah bad ki nongialam shnong ba ki dei ban long kiba peitngor da kaba bynrap ruh ba mynta ka kynti ka la dei ka por ban mih madan ym shuh ka por ban shu kyrshan tang napoh ing.
Naka liang u samla Pulljohn Wanniang pat u la ong ba ” Ki paitbah ki dei ban ai jingkyrshan ba pura bad iatreilang ruh ban pynthikna ba ka Jaitbynriew kan Lah ban Iengskhem ha kiba kum kine ki por jongka jingshah tynjuh. U samla Forwardman Nongrem President KSU South West Khasi Hills District pat u la ong ba ” Kane ka pateng jong ngi ai ba kan nym dei ka pateng ka ba ki longdien kin wan bynthiew haki lum jingtep jongngi naka daw ba ngi khlem lah ban iada iaka Jaitbynriew jongngi”.
La ong ba kum ka seng lyngba ka NESO ngi dang iakhun halor ka issue CAA haduh mynta hynrei long katba long lada ka sorkar India kan pyntreikam jubor ia kane ka ain ngi dei ban kynmaw ba Wat lada hap sei wait ruh ki Longkmie longkpa ne ki dkhot ka Jaitbynriew ki dei ban long kiba la kloi ban leh ia kata.
“Lada beh ia u khar Bangladeshi u don ka jaka ban leit phai ha Bangladesh hynrei lada shah beh ma ngi ki trai ri trai muluk pat shano ngin leit. Ki samla ka dei ban kiar naki jingmlien ba sniew namar kine ki dei ki bor hiar thma jong u nongwei ban jop thma iaka Jaitbynriew tip briew tipblei jongngi ” la ban biang u samla Nongrem.
U samla Pynshai Rani pat u la ong ba ” Ka Jaitbynriew ka dei ban ia tylli da kaba ngin bret noh ia baroh ki jingsngew iapher para mangi khnang ba ka Jaitbynriew kan iai khie rangsong. Ngi donkam ba ka sorkar kan pyntreikam noh mardor iaka Inner Line Permit haka jylla khnang ba ka Jaitbynriew kiba ritpaid jongngi kan kham shngain naka jingwan tuid jongki bar jylla bad bar ri”
