Shillong, Jymmang 23: Ka long kaei kaei kaba sngewsih bad ka jinglehbein iaki paitbah nongshongshnong jongka thain Wahkaji namar kane ka PHC kumba long mynta ka don tang uwei u MBBS Doctor bad kam don hi ruh ka Ambulance ne ka kali kit nongpang ban kit ban bah ha kum kane ka por ba ka khlam COVID 19 ka nang kiew hapoh jongka District hi baroh kawei.
Ia kane la lap daki nongialam ka KSU South West Khasi Hills District bad KSU Umdohlun Circle haka jingleit jurip ia kane ka PHC ha kane ka taiew kaba la dep hapoh ka jingialam jong u samla Dusterwell K.Lyngdoh Organising Secretary KSU South West Khasi Hills District bad President KSU Umdohlun Circle.
Ha kane ka jingleit jurip ka seng ka la lap ruh ba ym tang duna haka jingdon ki nongtrei hynrei kaba kham sngewsih shuh shuh ka long ba wat u Transformer ba don hapoh kane ka Compound um lah ban kit wat tang ban shet jingshet ne pyndonkam ki staff kiba donkam ban sah baroh 24 kynta hapoh ka Wahkaji PHC.
Ka Seng ka la lap ruh ba kane ka PHC ka don tang 5 tylli ki jingthiah bad tang kawei ka Cylinder Oxygen khamtam ha kaba kum kane ka por jongka jingkiew sted jongka Khlam hapoh ka dong ka thain. Ngi la iohi kum ka seng iaka jingtreishitom jongki nongtrei kane ka jaka sumar hynrei ka jinglehbein bad ka jingbymphai khmat lem jongka sorkar ka dei kawei ka jingeh ba ki nongtrei bad ki paitbah ka thain ki mat haba kum kane ka por.
Ka Wahkaji PHC ka hap ban peit lang iaki paitbah jong ki 30 tam tylli ki shnong bad ym tang katta ka jngai ruh kumba 40 kms tam naka District Headquarter kaba kum ka seng ngi iohi ba namar kata ba ka long kaba donkam iaka sorkar ban peit lem ia kane ka thain khamtam mynta ka kynti.
Ka seng ka kyntu iaka sorkar ba nalor ba ka long kaba donkam ban wanrah iaki Ambulances hapoh ka District , ngi sngew ba ka long kaba donkam ban ai kawei ka Ambulance 108 hapoh kane ka PHC namar kan long kaba eh ban kit kali paitbah khamtam haba kum kane ka por jongka Khlam.
Ka Seng haka jingiakren bad ki nongpyniaid iaka koit ka khiah jongka District ha kine ki sngi bala dep ngi la ioh jingtip ba ka sorkar ka la dep ban thung doctor biang hapoh kane ka PHC ha kaba yn don noh 2 ngut ki MBBS Doctors.
Ka KSU ka kyrpad rit namar kata kum ka seng ia kine ki doctors ba dei ban wan trei ha kane ka PHC ba ki dei ban trei hapoh kane ka PHC ha kaba ki paitbah kane ka thain ki donkam shisha iaka jingsumar kaba paka namar dang dei kawei naki jaka ba sahdien tam hapoh ka District.
Ka KSU ka kyntu ruh iaka tnad ka koit ka khiah ba ka dei ban tuklar ban pynbiang noh ka Ambulance, u transformers ba kham biang, ban kham pynbun iaki Oxygen Cylinders bad ruh kiwei kiwei ki jingdonkam kane ka PHC .
La kyntu ruh ia u MLA ka thain ba un sngewbha ban shimkhia lem ia kane ka mat na ka bynta ka jingmyntoi jongki paitbah hapoh ka thain, la ong u samla Dusterwell K. Lyngdoh Organising Secretary KSU South West Khasi Hills District bad President KSU Umdohlun Circle.
