Shillong, Naitung 04: U Additional Director General, Region Commander Md Shazedur Rahman, jong ka ri Bangladesh u la ong ba ka ioh ka kot jong ka ri kala kiew mynta bad ka jingphet ki briew na ka ri ban leit sha kiwei ki ri kala duna bha mynta.
La ong ba ha kane ka jingialang kaba saw sngi kaba long ha Shillong ia kaba la tip kum ka Inspectors General, BSF – Region Commanders, BGB level Border Co-ordination Conference, kila ia kren ha kaba ia dei bad ki kam ha khappud bad kumno ban ia treilang ha pdeng ki ar tylli ki ri ban don ka shongsuk shongsain ha khappud.
Ha kane ka jingialang la ia kren ba kumno ban ia leh pyrshah ia ki kam sniew, la ki dei ki kam lehnoh, ki kam khaii beain, ban pynthikna ba kan nym don ka jingiapyniap ha khappud bad ban ia treilang ha kaba ia dei bad ka jingpahara ha khappud ka India bad ka Bangladesh ha kane ka bynta.
Ka ri Bangladesh kam lah khlem da pynpaw ia ka jingsngewnguh ia ka Ri India kaba la ia shim bynta kyrpang ha kaban pynioh ia ka jinglaitluid ia ka ri Bangladesh, u la pynpaw ia ka jingsngewsnguh.
Na ka liang jong u Inspector General ki BSF jong ka Tripura Frontier u Patel Piyush Purusottom Das IPS, u la ong ba ha kane ka jingialang la ia mynjur lang ban pynkhlian ia ka jingia dei ha pdeng kine ki ar tylli ki ri ha ka riti dustur bad ban don ki jingialehkai ha pdeng kine ki ar tylli ki ri ha khappud.
Kane ka jingialang ka long ban dang pynkhlian shuh shuh ia ka jingiadei ha pdeng kine ki ar tylli ki bad ban don ka jingiatreilang ha pdeng ki ar tylli ki kynhun shipai kiba don ha khappud ban iada ia u pud sam ban peit ba kan don ka shong suk shongsain.
