New Delhi, Jylliew 17: U Myntri Rangbah Duh ka Ri India u Narendra Modi u la ong, Ki khun shynrang ba shlur jong ka ri ki lah aiti ia la ka jong ka jingim ha ka jingiada ia ka ri ha them Galwan.
“Nga nguh ia kine ki shipai kiba lah aiti ia la ka jong ka jingim na ka bynta ka ri. Nga iaroh ia ki lyngba ka jingsngewnguh jong nga”.
Ha kane ka khyllipmat jong ka jingsngewsih, u Modi u pynpaw ki jingsngewlem jong u sha kiba haiing jong kine ki Riewshlur. Mynta baroh kawei ka ri ka don ryngkat bad ki. Ka ri ka don ka jingsngewlem bad ki.
U Myntri Rangbah Duh ka Ri u la ong ba kane ka jingaiti kaba khraw jong ki Riewshlur jong ngi kan nym long lehnohei.
La ka jinglong jingman ka long kumno kumno ruh, ka India kan ieng skhem ban iada ia manla ka inshi jong ka khyndew ka shyiap jong ka ri bad na ka bynta ka burom jong ka.
Ka India ka don ka kolshor ba ieid ri. Ka histori jong ngi ka pyni ba ka ri jong ngi ka dei kaba ieid ia ka jingiasuk.Ka jingngeit jong ka India ka long beit.
Ha baroh ki por, ngi pyni beit ka jingkwah ba kan don ka jingiashongsuk ka jingiashong shngain ha kylleng ka pyrthei bad hapdeng ki briew baroh.
“Ngi don ka jingiadei kaba jan bad ki ri ba don marjan bad ngi ha ka jingiatrei lang bad ka jingsngew paralok. Ngi ju kwah beit ba kin long kiba kiew bad kiba shongsuk”.
Haba ka don ka jingiapher jingmut, ngi lah pyrshang beit ban pynthikna ba kine ki jingiapher jingmut kim kylla sha ka jingiakynat.
Ngim ju pynshit iano iano, hynrei ngim ailad ba kan don kano kano ka jingktah ia ka jinglong tylli jong ka ri bad ka hok synshar jong ngi ia lade. Haba donkam, ngi lah pyni ia la ka bor kaba lah pyni shai ba ngi lah ban iada ia kane ka jingiatylli bad ka hok jong ka ri.
Ka jinglen lade bad ka jingshah shitom ka dei kaba lah shong tynrai ha ka jinglong jong ka ri jong ngi bad ha kajuh ka por ka jingshlur ruh ka dei shi bynta jong kane ka jinglong jong ka ri.
U Myntri Rangbah Duh ka Ri u la ong “Nga kwah ban pynthikna ia ka ri ba ka jinglen lade jong ki shipai jong ngi kan nym long kaba lehnoh ei”.
Ka jingiatylli bad ka hok jong ka ri ban synshar hi ia lade ka long kaba kongsan ia ngi bad ym don mano mano ba lah ban pynsangeh ia ngi ba ngin iada ia kane. Ym don mano mano ba don ka jingartatien ha kaba iadei bad kane.
Ka India ka kwah ia ka jingshongsuk. Hynrei lada don ba pynshit, ka India kan ai ka jubab kaba biang.Ka ri kan long kaba dap da ka jingsarong ba ki shipai jong ka ki lah ai ia la ka jingim katba ki dang don hapdeng ka jingiakhun.
U Myntri Rangbah Duh ka Ri u 
kyntu ia phi baroh ba phin ai burom ia kine ki khun ka ri da kaba sngap jar haduh ar minit.
