Shillong Lber 04: U National Vice President ka party NPP u bah Prestone Tynsong u la pynrem jur ia ka jingmih ka huri hura ha kaba ka ophis Meda Infrastructure Pvt Limited ha Nongrim Hills, Laitumkhrah kaba long Director u MLA ka Mawthengkut u bah Methodius Dkhar ka la shah wiangding.
Haba kren mynta ka sngi sha ki lad pathai khubor, u la ong ba ka la don ka jingshah pynsyier ia ka ing ka sem u MLA ka Mawthengkut u bah Methodius bad kumjuh jong u bah Shakliar Warjri u MLA ka Mawthadraishan namar ki ai ka jingkyrshan ia ka sorkar ban ialam ka NPP.
U la ong ba i kumba ki don ki jaitbriew kiba thmu ban knieh ban shim ia ka bor ia ka synshar paidbah, ha kaba u paidbah u la jied ban phah ia ki nongialam sha ka ing dorbar thawain.
“Ngi pynrem jur ia kane ka jingleh, bad imat ki don ki seng ki bym idei shuh kum ki seng bhalang hynrei ki dei jong ki seng sain pyrthei jongno re jongno kum ka HITO bad HYC”, la ong u bah Prestone.
U la ong ba halor ka jingdawa ban ioh Myntri Rangbah u Khasi, hap ban pdiang ia ka rai jong ki paidbah kumba la ai rai. “Kam dei ban wanrah ia ka jingiapher hapdeng u Khasi, Garo bad Jaintia namar kine baroh kidei na ka jylla Meghalaya, la bthah ia ki bor jong ka ain ban peitngor ia ka shong suk shongain”, la ong u bah Prestone.
U nongialam ka NPP u bah Prestone Tynsong u la ong ba ka jingsynshar President kan ym jia ha kane ka jylla ha kaba u Conrad K Sangma un iaid shakhmat ban bam smai kum u Myntri Rangbah ka jylla ha ka 7 tarik.
U Bah Prestone u la ong ba ha kane ka jingbam smai u Conrad, yn wan sakhi lang u Myntri Rangbahduh ka ri u Narendra Modi bad u Myntri ka tnad Kam Pohiing ka sorkar pdeng u Amit Shah.U la ong ba ka sorkar ka la ai ka hukum kaba tyngeh ban ym wanrah ia kano kano ka jingthut ha ka shongsuk shongsain ha ka jylla.
