Shillong, Nailar 13: U Bah Sainkupar Nongtraw publicity Secretary jong ka seng HNLC kaba la niew beain da ka sorkar u la ong ba ha kane ka lyngkhuh snem kaba 31 jong ka HNLC, ka Seng ka ai khublei kyrpang iaki para nongialam, ki paradkhot, ki nongiarap ka seng khamtam eh iaki ba haiing ba hasem jong kito ki dkhot ka seng kiba lah khlad noh.
Ym lah ban len ba kum ka seng haki snem kiba lah leit ka lah mad iaka jingduk jingkyrduh, ka jingleit pyndem noh ki dkhot, ka jingshah pyniap,ka jingshahkem ki dkhot kumjuh ki tiarialeh, hynrei kine ki dei tang ki bynta haka jingialeh kiba kum ka seng ka hap ban iatyngkhuh.
Kumba long mynta ka seng kala iohi ba kila lah khambiang haka liang ka pisa, ki lah khambiang iaka jingdon ki dkhot haka jingbunpaid khamtam eh ka jinglah jong ka seng ban thied iaki tiarsiat kiba dang thymmai, wat lah ki hap ban iaid lyngba kino kino ki jingeh hynrei ka seng kam shym lah shongthait ban trei katba jan ka kti ne ka khlieh na bynta ban kyrsiew pat iaka Jaidbynriew ba kan lait naka jingshahtyllep, ka jingshah saitjabieng ha kita ki bor kiba napoh bad ki bor kiba nabar.
Ka jingpyniar ia u pud u sam jong ka ri lane ka khaii ka pateng jong ka India ka long ka jingma kaba lah ktah bha iaka Jaidbynriew Hynñiewtrep ha baroh ki liang. Ka Meghalaya wat hadien ba ka lah ioh iala ka jong ka Jylla kam shym don laka jong ka jingsynshar ba laitluid, ka hap shaniah beit haka Indian Parliament ba kan thaw iaki aiñ na bynta ka jylla kaba don tang lai ngut ki MP.
Ka seng HNLC ka iohi wat haba ka Assembly ne ka District Council ki kwah ban thawain ki dang hap ban ap iaka rai ba khatduh jong u Governor namar ba ioh ki Aiñ ba ki shna kin ktah iaka jingsngew india, ka jingialong shitylli ka India ne ba ioh ki aiñ kin iatyngkhuh bad ki aiñ jong ka Sorkar India hangne kein ba kita ki aiñ kiba lah thaw ki shu iap ei kumto.
Kum ka seng kaba ieng ban ialeh na bynta ki hok tynrai jong ka Jaidbynriew Hynñiewtrep ka sngewdei ban ong ba kino kino ki jingeh ba ka Jaidbynriew ka iatyngkhuh yn nym lah ban shu weng kumto hapoh ka riti synshar ri ka India, ka India kam ailad wat ba ioh iaki hok katkum ba lah pruidak daka United Nations Declaration on the Rights of Indigenous Peoples (UNDRIP).
Namarkata Ka bri Hynñiewtrep ka donkam iaka jingithuh kum laka jong ‘Jaidbynriew’, Ka bri Hynñiewtrep ka donkam iaka jingithuh iala ki jong ki hok jong ka khana pateng, Ka bri Hynñiewtrep ka donkam iaka jingithuh iala ka jong Ktienkmie, Ka bri Hynñiewtrep ka donkam noh ban ioh iaka jingithuh khamtam iaki khla ka wait kum u Tirot sing, Kiang Nangbah ym shuh kum ki nongialeh laitluid ka India hynrei kum ki nongialeh laitluid ka Jaidbynriew.
Kum ka seng hi ka iai buddien iaki nuksa u Wickliffe Syiem uba long u nongseng iaka mynsiem ieid ri ba kum ka Jaidbynriew khlem jied ban long ki nong India daka mon la jong, hynrei lah shu pynbor ban long ki nong India. Haka jaka ba ki Hima ki Shnong haka bri u Hynñiewtrep kin rakhe iaka sngilaitluid ka Ri India haka 15 tarik u Nailar ka bym dei hi ruh ka sngilaitluid jong ka bri u Hynñiewtrep ki lah dei ban rakhe daka sngi lyngkhuh sngi kha jong une u riewialeh bym lah pyndem kum ka ‘Wickliffe Syiem day’ uba lah kha ha kajuh ka tarik kata ha u Nailar 15, 1909.
Ha kine ki 31 snem ba lah leit ka HNLC ka ieng halor kitei ki jingshisha, halor kitei ki nongrim ba ka Jaidbynriew Hynñiewtrep kam shym dei satia ka bynta jong ka ri India. Ka Sorkar India kan nym lah daleilei ban pynbeit ia kine ki jingeh daki bor jong ki ktang suloi hynrei ka donkam ban weng ia kine ki jingeh ha jrong ka miej ban iakren sngewthuh lym kumta ka HNLC kan nym shongthait wat lada ka dang shimpor sa 31 tylli ki snem ruh. Ka seng HNLC ka long kiba kloi ban rung haka jylli jong ka jingiakren bad ka Sorkar khlem kino kino ki jingteh kyndon. La ong u Bah Sainkupar Nongtraw Publicity Secretary ka seng HNLC.
