Shillong, Iaiong 08: Ka “Shad Suk Mynsiem 2022” ha madan Weiking kan sdang la shai ka sngi bad kan kut ha ka sngi nyngkong, la antad ba ki nongshad kin poi hajar ban wan ia shim bynta na kylleng ka ri khasi, la ong u bah Banteilang S Rumnong shongknor ka tnad pathai khubor ka Seng Khasi Kmie.
Haba kren ha ki lat pathai khubor ha madan weiking la ong ba ka “Shad Suk Mynsiem” ka dei ka shad nguh blei bala kyrkhu baroh shisnem jong u snem bala dep bad ban kyrpad ruh ban kyrkhu ia u snem ban wan, kane ka shad mynta u snem kila ioh ia ka jingbit kaba ki hap ban bud ia ki kyndon.
U bah Arwan S Tariang symbut president ka Seng Khasi Kmie la ong ba ka shad suk mynsiem kadei ka shad ba la shad da ka jaidbynriew naduh ki por barim bajah ha Mawkhar katba dang iaid ki snem kala dang kiew ha ka jingbun ki nongwan ia shim bynta bad ia kane ka shad la rah sha Madan Weiking naduh u snem 1911 bad kala neh haduh mynta.
Kane ka shad kala iaid beit naduh katei ka snem ha madan Weiking haduh u snem 2019 kaba khlem ioh ban shad dei tang ha u snem 2020 na ka daw jong ka khlam COVID-19 hynrei ha u snem 2021 la ioh ban shad tyngkat ki kyndon bad mynta u snem ruh la ioh ban shad.
U bah D Suiam sekretari ba dei peit ia ka riam ka shad tynrai la ong ba kum ka seng ka pynpaw ia ka jingsngewnguh ia ka DC kaba la ai jingbit bad la bthah ruh ban but ia ki kyndon ba kum ka seng kan ialeh katba lah ban bud ia ki kynduh kiba la bthah da ka sorkar.
U bah Hainess Marbaniang general secretary kane ka jingshad mynta u snem ka long ruh kum shibynta ban rakhe ia ka jingioh laitluid jong ka Ri India ia ka jingdap 75 snem bad ka jingioh ia ka jylla kaba 50 snem bad na ka liang ka tnad shangsuwari kala noh syniang sha kane ka Shad Suk Mynsiem mynta u snem 2022.
