Shillong, Iaiong 11: Ka seng Khasi Seng Kmie kala but ryntih ia ki kyndon kiba la buh da ka sorkar ha kaba ia dei bad ka jingpynlong ia ka “Shad Suk Mynsiem” ba shisien shi snem ha madan Weiking ban ainguh ia u trai nongbuh nongthaw.
Ha kane ka jingshad Suk Mynsiem mynta u snem la shah ban rung sha lympyng tang ia ki nongshad kiba ka seng khasi kala dep ban ai ka pass ha kaba kin rung tang u ne ka nongshad bad ki nongsynran, ia ki nongwan peitkai mynta u snem khlem shah la leh ia kane katkum ki kyndon kiba la buh ka sorkar.
Ban pynthikna ba kiba ioh ban rung shapoh dei tang kito kiba la ioh ia ka pass na ka seng khasi seng kmie ia ki khyrdop la ap da ki nongap ban pynthikna ba kan nym don ka jingialum briew ha katei ka jaka shad bad na ka liang jong ki magistrate ruh ki don ban synranlang.
Ka jingshad ka long kaba ishong kun ha kaba ki thei samla bad ki rang dajied ki ia shim bynta ha kane ka jingshad ban ai nguh ia u trai nongbuh nongthaw bad ha ka juh ka por ban pynneh iala ka jong ka riti ka dustur kum ki khun khasi khara ba don la ka jong ka tynrai.
