Shillong, Jylliew 22: Ka Shillong Sports Association lyngba u Secretary – u Bah Dipshon Nongbri, ka la wan shakhmat ban pynbna ba shen kan sa sdang noh ïa ki lympung ïalehkai na bynta ka samoi 2024.
Hadien ba la ïoh ban pyndep ïa ka jingkyntiap klob ka Tournament Comittee ka la rai ban sdang noh ïa ka lympung ïalehkai Under-20 Fourth Division ha ka 27 tarik mynta u Jylliew, 2024. U Bah D. Nongbri u la pyntip ruh ba haduh mynta ki la don haduh 29 tylli ki kynhun kiba la thikna ban shimbynta ha kane ka lympung.
Katba ha kaba ïadei bad ka Third Division ka synjuk ka la pynkhreh ban sdang ha ka taïew ba lai jong u Naitung 2024, nangta bud sa ka Second Division ban sdang ha ka taïew ba Nyngkong jong u Nailar, 2024, ka First Division ha ka taïew ba lai jong u Nailar 2024.
Katba ïa ka Shillong Prwemier League kane ka lympung kan sdang ha ka taïew ba ar jong u Nailur 2024. Nalor kine, ka synjuk kan sa pynlong ruh ïa ka Championship League Cum Knock Out ha u Naiwieng, ha kaba la thmu ban pynïalehkai tang ïa ki kynhun ba rah namlahduh bad kiba poi kyrdan ba ar (Runners Up) ha ki lympung naduh ka Fourth Div ter ter.
