Shillong, Jymmang 30: U Dr Azad Zaman u MLA jong ka 47-Rajabala LA Constituency u la ong ba ka Agatha Sangma MP jong ka 2-Tura parliamentary Constituency kala thoh shithi sha u Prime Minister jong ka Ri India u Narendra Modi ban pyntip halor jingjulor ka rep ka riang na ka jingshlei um ha na ka daw jong ka jingwan ka eriong Amphan bad ha ka shithi la kew ia ka Phulbari, Titkrikilla bad Rangsamgre.
Na ka liang jong u MLA ka Rajabala Assembly Constituency Dr Azad Zaman u buh ka jingkylli halor katei ka shithi bala phah da ka MP jong ka 2-Tura sha u Myntri Rangbah duh jong ka Ri India u ha kaba ka khlem kyntup lang ia ka Selsella Block ha kaba bun ki jaka kiba hap hapoh jong ka Selsella bad Rajabala Assembly Constituency ha kaba ki briew ki rep ia u kba u ba la tip kyrteng kum u kba Bro bad kba Irri kiba la ngam hapoh um na ka daw jong ka jingshlei um.
U Dr Zaman u la kynnoh pyrshah ba kane ka shithi kaba la thoh da ka MP jong ka Tura long kumba niew bein ia ki nongrep kiba hap hapoh jong ka Selsella bad Rajabala Assembly Constituency. Ha kum kane ka por ba don kane ka khlam COVID-19 kum kane ka jingleh na ka liang jong u pynrem jur ia kane, ka MP kala leit ban jngoh ia ka Tikrikilla bad Demdema C& RD Block kiba la shah ktah ha kane ka jingshlei um.
Na ka liang jong u MLA jong ka Rajabala u ong ba u pdiang sngewbha ia kane ka jingwan jngoh jong ka MP bad u da ai ruh ka jingiaroh ba kala wan jngoh ia ki jaka ba shlei um bad kaba la ktah kumba 4000 Hetar ki jaka rep bat hung ia u kba Bro bad u kba Irri kaba hap hapoh jong ka Selsella Constituency.
“Nga leit ban jngoh ia ki jaka ba la shah ktah na kane ka jingshlei um hapoh jong ka Selsella Constituency bad u kba u la dei sa ka por ban ot hynrei u la shah tap lup hapoh um ha kane ka jingshlei um, ka jingjynjar jong ki nongrep kam don jingkut, nga la iohi ia ka shithi ba la thoh da ka MP jong ka Tura sha u PM Modi ban pyntip ia kane ka jingshah pynjulor ha ka mariang, nga ia roh ia kane” la ong u Dr Azad.
Ha ka juh ka por u Dr Azad u la kdew ruh ba ha katei ka shithi kaba la phah sha u Myntri Rangbah duh jong ka Ri India kala don tang ka kyrteng jong ki jaka kiba hap Raksamgre, Tikrikilla bad Phulbari, katba ka kyrteng Rajabala bad Selsella Constituency kiba bun ki jaka ki hap hapoh jong ka Selsella Block kam shym paw kyrteng ha ka shithi, kane ka jingleh ka dei ka jingniewbein ia ki nongrep jong ka Selsella bad Rajabala Constituency, la ong MLA ka Rajabala.
