Shillong, Nailur 03: U Advocate General ka jylla Meghalaya u Amit Kumar mynta ka sngi 03/Nailur/2026 u la ong “Ka shong ha ka sorkar ban weng ia nga kum u Advocate General ka jylla Meghalaya”.
Haba kren ha ki lat pathai khubor ha Shillong Press Club u la kyntait ia baroh ki jingkynnoh pyrshah ia u da ki ar tylli ki Bar Association, Ka High Court Meghalaya Bar Association bad Ka Shillong Bar Association bad u la ong ba um don kano kano ka jingpyrshah ia ki para muktiar lane ia kano kano ka Bar Association.
Haba iadei bad ka jingkynnoh ba u la kren tohmet kam long kaba shisha hynrei kaei kaba u la ong ba ka dei ban don kano re kano ka bor ka ban peit ia ka jingshngain ki muktiar kiba don ha ka jylla la ong u Advocate General.
Haba iadei bad ki jingkynnoh ba u la wanrah briew na shabar khlem da ai lad ia kiba na ka jylla halor kane ka jingkynnoh u la pynshai ba kiba don bad u ban iarap ia u Advocate General ki don 40 ngut bad kine baroh ki dei na Meghalaya, haba iadei bad ka jingsiew um shym la shim tam ne duna na kaei kaba ka sorkar kala pynmih ha ka jingpynbna sorkar ha u snem 2018.
Ka jingkynnoh ba la pyndonkam ia ki muktiar kiba nabar ha kiba bun ki bynta haba iadei bad kane u la pynshai ba u don la ka jong ka kynhun ki muktiar baroh kiba trei hapoh jong u ki don 11 ngut bad haba u pyndonkam ia ki kim shym la shim bainong eiei na ka sorkar Meghalaya, u pyndonkam ia ki tang ha ka por ba u donkam ia ka jingiarap kyrkieh.
U la ong ba kum kine ki jingkynnoh pyrshah ia u kam dei shuh ka sien kaba nyngkong, hynrei ha kane ka kynti kaba mynta kumba la ia tip paidbah ba ka jingkynnoh pyrshah ia u kala kham pher bad kane kala pynlong ia u ba u hap ban pynshai ia ka jingkynnoh bad ha kajuh ka por u la ong pynshisha ia ki jingkynnoh ba lada ki don shisha kum kita.
