Shillong, Jymmang 20: Ka JJM Nicols Roy Committee haba ka jingialam jong u bah Ransom Sutnga kila leit ban juruip ia ka Madan Kyndong kaba hap hapoh jong ka shnong Mission Compund Shillong naka bynta ban pynbha ia ka ha dien ba u myntri rangbah ka jylla u Conrad K Sangma u la ai ia ka pisa T.10,00,000/- tyngka na ka Chief Minister Special Development Found (CMSDF).
Haba kren ha ki lat pathai khubor ha dien ba kila leit ban jurip ia kane ka Madan Kyndong, u bah Ransam ba dei shongknor jong ka kommittee, la iathuh ba ka sorkar Assam ha u snem 1969 kala ai ia kane ka jaka sha JJM Nicols Roy Committee 78000 phut sawdong ban pynsah nam ia ka kyrteng u kpa ka District Council ha kane ka jaka.
Na ki daw bala shah kyntur pud namar ha ka por mynshuwa khlem ker ia kane ka jaka haba la thew biang kane ka jaka mynta ka don sa tang 52000 phut sawdong, kane ka long katkum ka jingthew kaba la ker kynroh mynta.
Kane ka jaka ka hap hpoh jingpeit jong ka kommittee bad u shongknor ba nyngkong jong ka kommittee dei u bah GG Swell, wan sha BB Lyngdoh, hapdeng jongkata kila don kiwei ruh bad u shongknor ba bat khatduh dei u bah AH Scott Lyngdoh bam kwai ha dwar u blei bad ka jingpynthymmai ia ki nongkit kam la jied ia u bah Ransom Sutang kumu shongknor.
Ka jingai ka sorkar Assam ia kane ka jaka ha kato ka por ka long ban burom bad ban pynsah ia ka nam ka kyrteng u kpa ka Sixth Schedule u bah James Joy Mohan Nichols Roy u riew khraw kane ka jaidbynriew, na kane ka kommittee mynta kan pyrshang ban wat kilat ki lynti pyndkam ia kane ka jaka na ka bynta ka burom u bah Joy. Ha kane ka sngi la don lang ruh kiwei ki dkhot jong ka kommittee.
