Shillong, Iaiong 23: Ka Sorkar India ka la pynmih ia kikyndon na ka bynta ki nongrep ha kine ki por ba don ka jingpakhang ia ki shnong ki thaw halor ka jingdon u khniang jingpang COVID-19 bad da kane la pyntip ba ki hospital veterinary kiba sumar ia kimrad ki jingri, ki tnat treikam ba iadei bad ka jingthied ia ki mar rep, kynthup ruh ia kiba iadei bad ka jingbuhdor ia ki mar rep, ki iew ba lapyniaid da ka Agriculture Produce Market Committee(APMC) lane kiba la pynbna da ka Sorkar Jylla.
Ki kam ba ki nongrep ki dei ban pyndep ha kaba iadei bad ka rep ka riang, ki jaka ai wai ia ki tiar ki kor rep lane custom hiring centres (CHC), ki jaka ba shna bad song ia ki dawai sboh, dawai bad symbai bad ha kajuh ka por ia ka jingpynkit ia ki kor rep riang kiba iadei ha kaba ot ia ki jingthung hapoh ka jylla bad shabar ka jylla ruh kumjuh, ia kine ki kam la pyllait na ki kyndon jong ka jing pakhang shnong da kaba dei ban kitkhia bad phikir ruh ia ki jingbthah ba la ai da ki tnat sorkar ha kaba iadei bad ka jingsumar bad lehkhuid ialade.
Namar ka jingdonkam kyrkieh ban pynpoi sha iew, la shah ruh ban ot ban lum ia ki mar rep ba lah long bad ban pynpoi sha ki iew ban lait na ka jingduh kine ki mar. Hynrei, la kyrpad ruh ia ki nongrep kiba trei ia kine ki kam, ba kidei ban bud thikna ia ki jingbthah ban iada ialade bad kiwei de na kane ka jingpang.
Kine ki jingbthah ki kynthup ia ka jingpyniajngai iwei na iwei kaba kumba 3 haduh 4 phut, ka jinglehkhuid da kaba sait barabor ia ki kti da ka sabon, ka jingdeng ia ki jingda khmut, ki jain ba iada kyrpang na une u jingpang, bad ka jingkitkhia ban pynkhuid ia ki tiar bad kor ba pyndonkam ha ka rep ka riang. La kyrpad ruh ia ki nongrep ban deng ki jingda khmut bad ban jngai 4 haduh 5 phut iwei na iwei ha ka por ba thad ryngkhiang, tylliat, pynkhuid, jied bad song ia ki mar ha ki jaka rep jongki khnang ban iada na ka jingrung ki jaboh bad pum pum shapoh u ryndang.
Ha ka por ba shongthait, por bam lane por ba rah ba kit ia ki mar jongki sha ki jaka pynlang, dei ban ia jngai 3 haduh 4 phut iwei na iwei. Ki mar ba ladep ot/lum dei ban pynlang ha ki jaka/kynton ba jngai kumba 3 haduh 4 phut bad ban ialeh ban don tang 1 ne 2 ngut kiba ia trei ha kawei ka jaka pynlang ia ki mar ba ladep ot.
Dei ban pynrkhiang/pynduna jingsngem janai ia ki symbai kum u kba, ki krai, ki rymbai hadien ba lah dep lum shwa ban buh ia ki ha ka pham ne ha ki iing. Kiar na ka jingpyndonkam biang ia ki pla byrni ba lah pyndonkam ha ka aiom ba lah dep ban khang lad ia ka jingkharoi ki khniang.
Pyndonkam da ki pla byrni kiba lah dep pdem ha ka dawai neem kaba 5% hadien ba lah dep thad pynrkhiang ia ki. Ka jing phikir weibriew ka long kaba donkam ha ka por ba rah/kit/thep ia ki mar rep bad ruh ha ki jaka iew ba die ba thied/ ne rynsan lilam. Ki nongrep ba pynmih symbai ki lah ban shalan ia ki symbai ki jong ki sha ki kompani lum symbai ryngkat bad ki kot ki sla ba donkam. Ki jing phikir ki long ruh kiba donkam ban bud ha ka ba ia dei ba ka jing die/ shalan ia ki jhur kum u sohsaw, u phulkubi, ki jhur sla jyrngam, u sohkhia bad kiwei de ki jait jhur ba pur ba ioh na ki lum/lyngkha.
Lada jia ba hap slap khlem por ha ka por ot ia u Kba, la bthah ban synreit da ka um mluh kaba 5% khnang ban khang lad ia ka jingspeh u kba ba ot. Ha ki jingthung hortikolshor kum ki jhur ki soh ha ka por ba la soh, ka jing adkar bad husiar ia ka rukom synreit, ki jingkhleh, ka jingpynpoi bad ka jingsait khuid ia ki pump spray ki long kiba donkam. Na ka bynta ki kynja rymbai lyiur ha ki hali kba hadien ba lah dep ot, ka jing iada na ki skain lieh da kaba pyndonkam ia ki buit ba khuid bad ki ba iahap lah ban leh khnang ban pynduna ia ki jingpang na une u khniang.
