Shillong, Nailur 27: U Chief Secretary ka Jylla Bah D.P Wahlang mynta ka sngi ka 27 tarik u Nailur 2024 u la ia thuh ba ka la don ka jingiakynduh bad ki nongialam jongka Shiromani Gurdwara Parbhandhak Committee (SPGC) bad ka Save Shillong Sikh (SSS), kiba la wan na Amritsar, Punjab.
Ha ka ba ula pynpaw ba ka Sorkar Jylla ka lah ban mynjur ha kaban pynkynriah noh ia ki 342 tylli ki Longiing ka Them Metor sha ka jaka shipai kaba don markhap bad ka Them Iew Mawlong.
Haba ioh ban ia kren bad ki nongthoh khubor na ka liang u bah DP Wahlang ula kubur ba ka la don ka jingialang bad ki Heh ka Harijan Committee kynthup ki dkhot ka SGPC, kiba la wan naduh Amritsar.
Kila pynpaw ba ka long kaba eh ia ki ban pdiang ia ka jingtyrwa ka Sorkar ban pynpra ia ka Gurdwara kaba don ha Them Metor bad kyrpad ia ka Sorkar Jylla ban wad da kawei pat ka lad ka lynti.
U la ong ruh ba hadien ka jingiakren kaba bniah bha, la shem ia ka lynti kata da kaba kyrpad ia ki bor shipai ban ai jaka. U la ong ruh ba kumta kila rai ban thoh sha ka Tnad shipai ba lada long kaba lah, ban ai katto katne ka jaka kaba don markhap ka Them Metor.
U la ong ruh ba kane kan ailad ia kine ki nongshong shnong ban shna hi iala ki jong ki Iing ha ka ban iarap iaka Sorkar ban tyngkai ia bun bah ka pisa kaba lah ban lut ha ka jingpynkynriah ia ki sha European Ward. Lada ki ioh ia ka jaka, ka Gurdwara ruh kan neh beit ha kajuh ka por bad ia ka jaka ba sah yn sa shimti noh da ka Sorkar ban pynroi.
U bah Wahlang u la pyntip ruh ba ka Sorkar Jylla kala dep ban phah ia ka shithi sha u Defence Secretary ka Sorkar Pdeng bad shen kan sa don ruh ka jingialang jong ka High Level hapdeng u Myntri Rangbah ka Jylla bad u Myntri ka tnad iada ri. U la ong ruh ba lada ka Sorkar ka ioh ia ka jaka na ki shipai, kine ki Longiing kin ym donkam shuh ban leit sha European Ward.
Yn shu pynkynriah ia ki sha ka jaka ba thymmai kaba don sha shiliang ka surok bad kine ki Longiing kin sa pynlut hi ia ki jingtei baroh. Kane ka dei ka kular bala ai da ka SGPC bad kiwei kiba iakhun ia ka jingeh jong kine ki Longiing.
