Shillong, Nailur 24: U myntri kam poh iing ka jylla u James K Sangma haba jubab ia ka jingkylli jong Bah Nujorki Sungoh halor ka jingdawa ban kyntiew noh ia ka Laskein Block sha ka kyrdan Civil Sub Division, u la ong ba ka sorkar ka dang bishar biah ia kane ka jingdawa.
Haba jubab ia ki jingkylli bynrap, u myntri kam poh iing u la ong ban thaw ia kane District, Civil Sub Division ne ka Adminstrative Unit ki don ki kyndon kiba ka sorkar ka hap ban but bad kita ki long ka jinglong ka jaka, ka jingdon ki piadbah nongshong shnong, ka jingjngai naka nongbah jong ka District, ka jaka pule, ki jaka sumar, ka ioh ka kot bad ka kamai ka jih, kilynti syngkieng bad ka jingdon ka pisa.
U myntri kam poh iing u la ong ba ka sorkar kala thaw ia ka committee ia kaba la tip kum ka ban peit bniah ia kane namar la kitei lada thaw ia ka District, Civil Sub Division lane ka Adminstration unit hap ban buh ia ki nongtrei bad ka pisa ban siew ia ki nongtrei.
Ka jingdawa ban kyntiew ia ka Laskein Block sha ka Civil Sub Division ka dei naduh u snem 1993 ter ter haduh mynta bad kane ka Block ka dei kaba rim bha la plie ia ka ha u snem 1973. U myntri u la jubab ba ka dei ka jingshisha ba la plie ia ka Ranikor Civil Sub Division.
La iathuh hapoh ka iing dorbar ba haduh mynta ki don 12 tylli ki jaka ba la dawa ba dei ban plie ia ka Civil Sub Division bad ka sorkar ka dang bishar bniah ia ki baroh bad ka Laskein Block ka dei ka wei na kita
