Shillong, Nailar 22: Ki rangbah shnong ka thian Mawsynram ha ka 21 tarik u Nailar 2024 kila iakynduh ia u Symbud Myntri Rangbah ka Jylla ba khmih ia ka Tnad PWD u Bah Prestone Tynsong, ban buddien halor ka jingdawa ban shna pynheh noh ia ka surok na Weiloi sha Balat.
Ha kane ka jingiakynduh ia u symbut myntri rangbah u bah Prestone Tynsong kila don lang ki rangbah shnong bala don lang ki seng bhalang jong ka Thain Mawsynram, u MDC ka Mawsynram Bah Alvin Sawkmie bad u MLA barim bad Nongialam ka NPP Bah HM Shangpliang
Haba kren ha ki lat pathai khubor ha dien ka jingiakynduh ia u bah Prestone u bah Alvin Sawkmie ba dei u MDC ula pyntip ba ha ka jingiakynduh bad u symbud Myntri Rangbah ula pyntip ba ka Sorkar ka dang pyn khreh ia ka Detailed Project Report (DPR) ban pynkylla noh ia ka surok Weiloi-Balat sha ka surok Intermediate.
U la pyntip ba ka Sorkar Jylla kan sa pynrung ia kane ka project kum kawei na ki project ka ban bei tyngka da ka World Bank, ia kaba yn sa bei pisa na ka World Bank ha kaba ia dei bad kane ka surok kaba don kam.
U bah Sawkmie u la ong ruh ba Symbud Myntri Rangbah ula pyntip ba ka PWD ka dang pynkhreh shaid shaid ba pyndep iaka DPR hynrei katba ka jingpynkhreh ia ka DPR ka dang iaid, ka Sorkar kan sa mang shwa ia ka pisa ban maramot iakane ka surok.
U Bah Alvin ula iathuh baka jingjrong jong ka surok na Mawphlang-Welloi shaduh Balat ka don kumba 80 km bad kadei ruh kawei naki surok kaba rim tam hapoh Meghalaya ia kaba la shna naduh ki por ba ka Ri India kam pat ioh iaka jinglaitluid.
U la ong ruh ba lada pynkylla ia ka Surok na Weiloi sha Balat kum ka surok Intermediate, kan long shisha ka jingkyrkhu iaki paidbah khamtam iaki nongrep kiba pynpoi iaki mar rep shaki Iew ki Hat.
