Shillong, Risaw 03: Haba kren ia ka kam jngohkai pyrthei ha kane ka jylla Meghalaya ka mut Sohra, ki briew na kylleng ka pyrthei bad kum juh ia ki myntri ka sorkar pdeng haba ki wan sha Meghalaya ki juh leit sha Sohra ban jngoh kai ia kane ka jaka ba paw na sla pyrthei.
Ka sorkar Meghalaya kala kam ba kan pynlong ia ka kam jngoh kai pyrthei kum kawei na ki lat ai kam ai jam ia ki paidbah ka jylla Meghalaya bad baroh kawei, hynrei kaba sngewsih ban iohi ba tang ki surok ban leit sha ki jaka jngohkai pyrthei kiba don ha Sohra ki surok ki long kiba sniew.
Kawei na ki jaka jngohkai kaba la krhing bha ia ki briew ban leit sha Sohra ka dei ha Bri-Ki-Synrang, kane ka surok la pynbha ia ka hyhnrei khlem pyndep haduh ban da poi sha katei ka jaka ba don ka jaka jngohkai, kane ka jaka don maw Dohnud, kaba don ka dur jong u Dohnud ha u Maw.
Ka surok na jan Iew Sohra ban leit sha ka kshaid Nohkalikai ka bha tang na khap surok Iew haduh ka skul jong ka Ramkrishna Mission hynrei na katei ka jaka haduh da poi sha Nongkalikai ka surok ym dei tang ba ka sniew hyrei ka jingrit kane ka surok kaba la buh ia ki nongleit kai ha ka jingeh ban ia pynlait kali wat ki kali rit ruh.
Namar ka jingitynnad ka Sohra wat hapdeng ka jinngsniew jong ki surok hynrei ki paidbah ki tuid ban leit sha Sohra ban leit jngoh ia ki jaka ba bun kiba don ha katei ka jaka kum ka kshaid Nohsngi Thiang, ka Khoh Ramhah, ka krem pubon bad ki jaka kum ka Dainthlen bad kiwei kiwei ki jaka kiba dang mih thymmai kiba la shna pynbha da ki riew shimet bad kum juh ki shnong kithaw.
