Shillong, Naiwieng 12: U Myntri Rangbah ka jylla u Conrad K Sangma haba jubab ia ka mat ia kren kaba la wanrah da u bah Meralborn Syiem ba pynsangeh ka sorkar ia ka jingtei ia ki jaka rung jaka mih, na ka liang jong u myntri rangbah u la ong ba ka sorkar kam shym pynsangeh ban shna ia ki jaka rung jaka mih ha ki khappud.
Haba ia dei bad ka jingshna ia ka khyrdop ia ka jaka rung jaka mih ha Umling Ri Bhoi District u myntri rangbah u la ong ba ia kane ka jingtrei ym pyndep hapoh mynta u bnai 2020, ka dei ka jingshisha ba ka sorkar kala pyndam ia ka bala mang mynshuwa kaba la kot sha ka T.15 klur.
Namar ka jingdon kam kyrkieh jong ka kam, ka sorkar kala pynduh ia ka jingmang pisa kaba rim bad lamang pisa thymmai pat ban shna ia khyrdop jaka rung jaka mih kaba don ha Umling kaba dei ka jaka jong ka sorkar bad kane kan pynlait ia ka sorkar na ka jinglut ksan ka jingmang pisa na ka bynta kane ka long T.2.85 klur ia kaba yn pyndep mynta u bnai.
U Myntri rangbah u la ong ba kine ki jaka ki long kiba don kam banpeit ia ki briew kiba rung bad kiba mih ruh kum juh, u myntri rangbah u la ong ba lada 100 ngut ki briew ki wan ym baroh ki ban leh bakla, hynrei lah ban don wei ne ar, kane ka jingshim kyrteng ha ki khyrdop kan iarap shibun ia ka sokar.
U Myntri rangbah u la ong ba la shim nyngkong eh ia ka Umling namar kane ka dei ka jaka ba ki briew ki iarung mih bha, ia kaba ha Mendipathar yn pyndep ha u bnai Nohprah, la ong ba ha ka bynta kaba nyngkong ban shna ia kine ki jaka rung jaka mih kin don 24 tylli bad ha ka bynta kaba ar ki long 41 tylli.
U Myntri Rangbah u la pyntip hapoh ka iing dorbar ba ka West Khasi Hills District la ioh ia ka jaka ba dei ha Athiabari, ha West Jaintia Hills ha Khanduli, ha East Jaintia Hills ki don san tylli ki jaka bad ka Ratachera ka long kaba kham kongsan ia kaba ka sorkar kam shim ia ka jaka jong ka JHADC. Ha West Garo Hills ki don lai tylli, South West Garo Hills ki don lai tylli, North Garo Hills ki don hynniew tylli.
Haba ia dei bad ka jingpan ban pyntrei kam ia ka Inner Lime Permit ha kane ka jylla, mynta ka dang don hapoh ka jingbishar jong ka tnad kam poh iing ka sorkar pdeng, la ong ba na ka liang jong u u la ia kren ia kane bad u myntri ka sorkar pdeng bad kala don ruh ka jingleit ia kynduh kum ka kynhun.
Haba ia dei bad ka jingpynkylla ia ka Meghalaya Resident Safety bad Security Act, la ong ba u Lat jong ka jylla u la phah biang sha ka sorkar jylla ban peit biang bad ka sorkar ka dang bishar bniah mynta ban peit na ka bynta ka jingbit jingbiang lang jong baroh khlem da pynshitom iano iano.
