Shillong, Nailur 05: U myntri rangbah ka jylla u Conrad K Sangma u la kren shai kdar ba ka nongrim ba ka sorkar ka ieng ka long kaba shai ba ka sorkar ka long kaba la kloi ban ia kren bad kano kano ka kynhun tang lada ki wan ban pyndem wait shuwa.
Haba jubab ia ki jingkylli ha kaba ia dei bad ka jingkwah ia kren ia suk jong ka seng lehnoh Hynniewtrep National Liberation Council (HNLC), u myntri rangbah u la ong ba ka sorkar ka kloi ban ia kren lada kin wan ban pyndem wait.
Haba ia dei bad ka jingmih khubor ba ki dkhot jong ka seng GNLA kila mih ban phai biang sha ki kam kaikhlaw, u myntri rangbah u la ong ba, ka kamram jong kano kano ka sorkar, kynthup ia kane ka sorkar ka jong u ka long ban tehlakam ia ka jingshong suk shongsian bad kane ka dei ka kam kaba ha khmat eh.
Halor ki jingeh kiba ki dkhot jong ka seng GNLA ki ia kynduh u la ong ba ka sorkar ka ia leh katba lah ban pynbeit ia ki, hynrei kane ka kam kam dei eh tang ha ka sorkar jylla ka don ruh ka tnad kam poh iing jogn ka sorkar pdeng. Ban pynbeit ia ki jingeh lah ban leh tang ba ym kumne kumne.
Haba ia dei bad kam ban pynlait ia ka jingkhang tih dewiong ha ka jylla u myntri rangbah u la ong ba naduh ka sngi ba ka sorkar ka shimti kala don ka jingiakren bad ka sorkar pdeng kumno 12 sien bad ka kam kala sdang ban iaid beit sha khmat mynta.
U la ong ba ha dien ba u la shimti kum u myntri rangbah ka sorkar jylla u la but dien bha ia kane ka kam bad u shem ba ka don ka jingdkhoh ha kaba sdang bad kane ka sorkar kala lah ban pynbeit ia kita ki jingdkhoh baroh.
Ha ka juh ka por na ka liang jong u myntri rangbah u la ong ba ki don ar tylli ki bynta kiba ka sorkar kan nym lah ban ia pein, kata ka long ban iada ia ki nongtrei tih dewiong bad ha ka juh ka por ban iada ia ka mariang, kine kiba ka sorkar kam lah ban ia pein.
Ha ka juh ka por ki jingeh kiba don ha khmat mynta ban pynbeit ka long ha kaba ia dei bad ka jinglong trai, dei halor kane ka nongrim ba ka sorkar ka kwah ba ka sorkar pdeng ka dei ban pyntrei kam ia ka Para 12 A(b) jong ka Sixth Schedule. Ka jingiakren kala iaid sha khmat wat la ki jingeh kiba ki ain jong ka sorkar pdeng ki don kum ka MMDR Act.
Halor ka jingkhap ngiah kali ha kane ka nongbah Shillong, ka sorkar kala shim khia bha ban ialeh ban pynlait ia kane ka jingdheng kali, ia kane yn nym lah ban leh kumne kumne namar ka don kam ia shibun ki ei ei ban leh, ka sorkar kala peit bniah bad ki don lai bynta kiei kiei kiba hap ban leh ban lait kane ka jingdheng kali.
Kaba nyngkong ka long ban pynbeit ia ka rukom iaid ki kali da kaba pynbun ia ki nongtrei ha ka tnad pyniaid kali, kaba ar ka long ba ka sorkar ka la shem ba ki don 18 tylli ki jaka ha kane ka nongbah shillong kiba lah ban pynheh iaki ba kan iarap ia kane ka jingsah kut kali bad kaba lai ka long ba ki dei ban don ki surok kiba lah ban iaid ki kali khlemd a rung sha kane ka nongbah Shillong bad kaba don kam ka long kum ka Shillong Western Bye pass.
