Shillong, Nailar 21: Ha ka jingleit jong u myntri rangbah ka jylla u Conrad K Sangma mynta ka sngi sha East Garo Hills District u la plie ia ka ophistrei kam ba pura jong ka ophis jong ka Municipal ha Williamnagar, ha ka jingiadon lang u MLA kane ka jaka u Marcuise Marak ba dei ruh u myntri sorkar bad u MLA ka Rongjeng u Jim Sangma.
Haba kren ha ka jingialang ban plie ia ka ophis jong ka WMB, u la ong ba la sdang paw ki jingtei kiba ka sorkar kala pyntrei na ka bynta ki paidbah ka jylla bad ki paidbah kila sdng ban iohi mynta namar ka sorkar haba ka pyntrei ia kino kino ki jingtei ka buh da ka por ban pyndep.
U myntri rangbah u la ban jur ba kane ka sorkar kala shim khia ban pynbun ia ki jingtei na ka bynta ba ai bor ia ki paidbah bad ban kyntiew ia ka ioh ka kot da kaba plie lat ia ki paidbah ha ki kam ki jam kiba kham biang.
Ka sorkar ka iohi ba dei ban shna ia ki surok namar lyngba ki surok lah ban pynkiew ia ka ioh ka kot bad lyngba jong ki baroh ki nongshong shnong ki ioh lang ia ka jingmyntoi, nalor ki surok ka sorkar kan pynioh ia ki jaka pule kiba biang, ki jaka ai jingsumar kiba biang na ka bynta ki paidbah.
La ong ba ka jingplie ia ka ophis ba pura jong ka WMB kane ka long kawei ka bynta ban kyntiew ia kaba ki paidbah ki don kam, ki dukan kin long ki jingmyntoi ia ki paidbah, na ka bynta ka sor Williamnagar ka sorkar kan pynbha ia ki surok kiba don hapoh kane ka sor kum ka jingpynbha ia kane ka sor bad kan don rh ka Mini Stadium.
La pynbna ruh ba ka sorkar kan pynbha ia ka Rongrenggre Higher Secondary School, kaba dei ka skul kaba la rim tam hapoh ka District na ka bynta ka jingbit jingbiang ki samla ba pule ha kane ka skul, kane ka long shibynta ban ai ia ka jinghikai kaba bing ia ki khun samla.
Ha kane ka sngi la leit ban jurip ruh ia ka jingtrei ia ka Williamnagar College, ka jingshna ia ka Mini Stadium ha Williamnagar, ia ka surok kaba shna ban poi sha shnong Rangmal Badim bd Chidekgre, la ong ruh ba ki lat pathai jingtip kim poi sha baroh ki shnong ki thaw. Ha kane ka sngi u la sam ruh ia ki M.Tab sha ki khynnah skul bad pynlait ruh ia ki kali kit marrep.
