Shillong, Lber 28: U Myntri Rangbah ka jylla u Conrad K Sangma ha ka sngi Thohideng la ong ba ka sorkar kan pynioh ia ki jingkieng doi doi sha ki nongkyndong ban suk ka leit ka wan jong ki paidbah bad kan suk ha ka kit ka bah.
La ong ba ki don bun bah ki shnong ha ka jylla kiba la pyniakhlad da ki wah, kumta ka sorkar kala pynkhreh ia ki skhim lyngba ka World Bank ban pyniasoh ia ki shnong ki thaw kiba hap ban kam lyngba ki wah ba kin ioh ia ki jingkieng doi doi, ia kane la long ha ka por ba plie ia ka jingkieng Doi Doi ha ka shnong Dambagre ha WGH District.
Ka jinghrong kane ka jingkieng ka long 80 meter halor ka wah Bandra bad kane ka jingkieng ka pyniasoh sha ka shnong Dombagre bad ka surok Sesengpara Kherapara, ki paidbah nongshong shnong ki don 2000 ngut ei ei.
Kane ka jingkieng doi doi la shna ha ka jinglut kaba T.2.08 klur tyngka, ka jingkieng kaba rim lala shah rong noh ha ka umsaw ha u snem 2022, da ka jingshna ia kane ka jingkieng kala pynduna ia ka jingiaidlynti da 11 km bad kane kan pynmyntoi ia ki paidbah.
U Myntri Rangbah la ong ba kane ka jingkieng kan long ka jingiarap kaba tang shipor namar ka sorkar ka dang pynkhreh ban shna ia ka jingkieng iaid kali ban wanrah ia ka roi ka par sha katei ka thain. Ha kane ka jingleit la plie ruh ia u Mobile Tower ha katei ka jaka.
