Shillong, Lber 09: U Myntri Rangbah ka jylla u Cornad K Sangma ba dei peit ia ka pla pisa haba jubab ia ka jingkylli kaba la wanrah da u bah Process T Sawkmie ha kaba ia dei bad ka Arrears jong ki nongtrei sorkar, na ka liang jong u myntri rangbah u la pyntip hapoh ka iing dorbar ba na ka 30% kaba dang sah la pynlait ¼th bad kata ka long 7.5% na ka Arrears ka dei baroh.
U Myntri Rangbah u la pyntip hapoh ka iing dorbar ba ha kane ka snem mang tyngka kaba mynta kala don ka jingduna sha ba palat ha ka jingioh pisa na ka sorkar pdeng, kane la jia na ka daw jong ka khlam COVID-19 dei halor kane ba ka sorkar ka hap ban thew diengkot ha kaba pyndon kam ia ka pisa.
Ka sorkar kan ia leh ban pynlait ia kane ka pisa kaba dang sah 22.5% kaba dei ka Arrears ha u ne u snem mang tyngka 2020-2021, kane kan shong ha ka jingdon kam pisa la kren shai u myntri rangbah ka jylla u Conrad K Sangma.
Haba jubab ia ki jingkylli bynrap na ka liang jing u mytnri rangbah u la ong ba haba khein kyllum baroh ka jingduna ka jingioh pisa kan kot sha ka T.2500 klur tyngka dei halor kane ba ka sorkar ka hap ban long kaba adkar ha kaba pynlut ia ka pisa.
U mytnri rangbah u la ong ba wat ha pdeng kine ki jingeh kiba bun ka sorkar kala buh ia ka thong kaba ha khmat eh ban siew ia ka Arrears jong ki nongtrei sorkar lada don ka pisa ban siew, namar khlem ma ki ruh ki kam jong ka sorkar kan ioh kumno.
