Shillong, Risaw 19: Ka Hynniewtrep Achik National Movement (HANM) seng kmie kala dawa na ka sorkar jylla ba kadei ban shim khia na ka bynta ban tuklar ba ki Nepali kidei ban sangeh ia ka jingwan mushlia ha Langpih kaba hap ha West Khasi Hills District lem kumta ka HANM kam banse ban iada na kane ka jingwan mushlia.
Haba ia kren bad ki lad pathai khubor hadien bala wai ka jingialang ka Executive Committee (EC) jong ka HANM u Bah Lamphrang Kharbani uba dei u President u la ong, ba ki Nepali ki dang iai bteng ban wan mushlia ha Langpih kaba dang hap hapoh u pud u sam jong ka ri Khasi ka HANM kam banse ban iada.
Halor kane ka jingwan mushlia ka seng ka dawa na ka sorkar ba kadei ban tuklar noh mardor bad kine ki briew bym dei na ka jylla ba kidei ban sangeh noh shi syndon ia ka jingwan mushlia lem kumta ka seng kan nym lah ban shu sngap jar.
Ha kawei pat ka liang halor ka jingthmu jong ki katto katne ki briew kiba thmu ban wanrah ia ka jingpynsngewthuh bakla da kaba la kynnoh bad pynshit ba shah thombor ki Bengali ha Ichamati, U Bah Lurshai L Rympei uba dei u Asst. Chief Organising Secretary ka HANM u la ong halor kane ka bynta ka HANM kan sa leit ban ia kynduh ia u Lat ka jylla u Satya Pal Malik bad kumjuh ruh ia u Myntri Rangbah u Conrad K Sangma halor kane ka mat.
Shuh shuh u Bah Lurshai u la ong, “Ka sorkar kadei ban shim khia bad ban ym ai lad ban mih ka jingklumar bad kadei ruh ban leh eiei na ka bynta ki katto katne ki briew kiba thmu ban wanrah ia ka jingiapher jaitbynriew wat hapdeng ka jingshong suk shong saiñ hapdeng kane ka khlam COVID 19” u la ong.
Ka HANM kan ym ai lad ia ki briew kiba thmu ban mushlia bad kiba thmu ban pynshit jaitbynriew ha ka jylla Meghalaya ia kiba la kynnoh kiba khlem nongrim hangno hangno ruh bad kane ka dei tang ka buit poh jongno re jongno u la ong.
Na ka liang jong ka HANM haba thalaiñ ia ki jingkynnoh bym don nongrim jong u Bah Lois Dohtdong uba dang shu mih noh na ka seng u Bah Lamphrang Kharbani u la ong ba ka HANM ka babe bha ba pdiang ia u ban pyniasoh bad ka HANM.
Halor ka jingkynnoh u Bah Dohtdong ba ka seng HANM kam don pisa, la kubur ia kane ba ka seng HANM kam don fund ne pisa namar ba ka seng HANM kam dei ka seng ban shu kamai pisa hynrei ka trei na ka bynta ka ri bad ka jaitbynriew.
