Shillong, Nohprah 03: U Myntri Rangbah ka jylla u Conrad K Sangma mynta ka sngi u la ia kynduh ia ki paidbah ka West Khasi Hills District lyngba ka CM-Connect ha ka jingialang kaba la long ha Nongstoin mynta ka sngi.
Ha kane ka jingiakynduh u myntri rangbah ka jylla ia ki paidbah la don lang ki ophisar na ki tnad sorkar bapher bapher bad na ki shnong bapher bapher kiba la wan sha kane ka jingialang ban ioh ia kren markhmat bad u myntri rangbah ka jylla.
Ki riew rangbah na ki shnong bapher bapher kila pynsngew ha khmat u myntri rangbah ka jylla ia ki jingeh kaba ki paidbah ki ia kynduh ha kaba ki don kam ia ka jingtuklar lem jong u myntri rangbah.
Ki riew rangbah na ki dong bad ki shnong bapher bapher,kila pynpaw ba ka thain ka don kam ban shna ia ki jingkieng iaid kali, surok, ki jaka ai jingsumar, ban pynitynnad ia ki jaka jngohkai pyrthei.
Ki riew rangbah kila pynpaw ba don kam ia ki jaka ialehkai, ka jingduna jong ki bank ban pynkiew ia ki jingiarap na ki skhim bapher bapher, ban kyntiew kyrdan ia ki jaka pule bad ban pynbun ki jaka sumar mrad bad bun kiwei kiwei.
U myntri rangbah ka jylla u la shah skhor ia ka jingpynsngew jong ki riew rangbah ki long kmie ka WKH District ia ki jingdon kam kaba ki paidbah ki angnud hapoh ka District bad la bthah ia ki ophisar jong ki tnad sorkar kiba don ha kane ka sngi ba kin leh ia kaba ki lah ban pyndep.
Haba ia dei bad ka koit ka khiah u myntri rangbah ka jylla la ong ba ka sorkar kan dang pynbha shuh shuh ia ki jaka ai jingsumar kiba don mynta ban pynbiang ia ki jingia jingsumar sha ki paidbah.
Ka sorkar ka ai lat ia ki seng ruh ban pyniaid ia ki jaka ai jingsumar ban pynbha ia ki jaka sumar. Ka sorkar kan dang pynbha shuh shuh ia ka Nongstoin Civil Hospital.
Haba phai sha ki kam ialehkai ka sorkar kan pynlut T.1000 klur tyngka ban shna ia ki jaka ialehkai ha kylleng ka jylla bad ka sorkar kan ia treilang bad ki paidbah ban pynkhlian ia kam ialehkai sha ki nongkyndong.
Haba ia dei bad ka sut kaba ki kynhun ia treilang ki shim, ia kane ka phang u myntri rangbah u la ong ba ia kane ka bynta hap ban rah sha ka myntri kam pla pisa ka sorkar pdeng. Haba ia dei bad ki surok la ong ba ki don ki surok kiba la sdang shna lyngba ka skhim CM Rural Connect Programme.
U myntri rangbah ka jylla u la ong ba u sngew kmen ba lyngba kane ka lynti CM-Connect u la ioh ia ka lat ban ia kynduh bad ki paidbah ka West Khasi Hills ban ioh sngew da lade ia kaei kaba ki paidbah ki don ban pynsngew ia ki jingeh, u la kyntu ia ki ophisar bad ki MLA ba kin ia kynduh ia ki paidbah ha ka kyrdan jong ki. Kane ka dei ka sien kaba san ba u myntri rangbah ia kynduh ia ki paidbah lyngba kane ka CM-Connect.
