Shillong, Iaiong 02: U Myntri ka Tnad Excise u Bah Kyrmen Shylla u la pyntip ba ka Tnad ka la pynsangeh shipor ban ai licence thymmai ban plie wine store bad bonded warehouse katba ym pat pyntrei ia ka lynti ba thymmai ban pynbeit ryntih ia ka rukom ai licence.
U Bah Kyrmen haba kren sha ki lad pathai khubor, ula ong ba la pynsangeh ban ai licence ia mynta shipor. Hynrei ynsa wanrah ia ka rukom treikam ba thymmai bad hadien nangta yn sa sdang biang ban ai licence hadien ba la pynlong ia ka jingwad bniah kaba sani bha.
Shuh shuh u la ong ba ki kam jong kila don ha ka kam bad la pynlong ia ka jingwad bniah ba thikna ban tip ba hangno donkam ban pynbun ia ki wineshop bad hangno ba donkam ban sangeh noh, katkum ka jingong jong u, ia kane ka rai la shim hadien ka jingioh pdiang ia ki jingujor na ki trai wineshop ba kim ju lah die bha ia ka kyiad namar ka jingdon bun palat ki dukan kyiad.
U Myntri ula ong, ki dukan kyiad ba don marjan ki jaka pule bad jaka mane Blei ka tnad ba dei peit kan sa khmih bniah ia kane ka kam hynrei ym shym la don satia ki licence thymmai ba la ai, ia ki licence la ai da ka ba pynshong nongrim na ka NoC ba la ai da ki Rangbah Shnong.
U bah Kyrmen Shylla u la pynpaw ia ka jing burom ia ka jingsngew u paidbah bad u Rangbah Shnong u dei uba tip khambha ia la ka jong ka shnong bad ula shah jied da ki paidbah jong ka Shnong. Kumta, ngi sngew ba ka long kaba donkam ban shim ia ka jingbit jong u khnang ba hadien habud lada ki kam ki long pyrshah lane u paidbah u pyrshah, yn lah ban iakren bad ki Rangbah Shnong.
