Shillong Nailur 20: U Myntri Rangbah ka jylla u Conrad Sangma u la iathuh ba ka sorkar jylla Meghalaya bad ka sorkar Assam ka ladep iakren ha kiba bun ki jingialang na bynta ban pyntikna ban don ka shongsuk shongshngain ha ki jaka khappud.
Ia kane u Myntri Rangbah u la pynpaw ha ka Zero Hour’ ba la wanrah da u MLA ka VPP u bah Ardent Miller Basaiamoit halor ka jingbyrngem u nongialam ka Karbi Students Association (KSA) ba un jia kumba jia ha Manipur lada duh ia ki jaka.
U bah Ardent u la ong ba kane ka jingmaham jong u nongialam ka KSA ka lah ban ktah ia ka jingshongsuk shongshngain ha ki jaka khappud bad u la pynpaw ba u kwah ban tip kaei ka sienjam ba ka sorkar ka la shim.
Haba pynshai ia kane, u Myntri Rangbah u la iathuh ba dang shen ha ka 16 tarik Nailar,2023 ha ka jingialang hapdeng ki ar tylli ki Regional Committee jong ka West Jaintia Hills bad West Karbi Anglong District ba long ha Khanduli.
Ka KSA ka la wanpoi ha katei ka jaka da ka jingthmu ban iakren bad uba mihkhmat ia ka Regional Committee hynrei u President ka KSA u la iakren bad ki lad pathai khubor bad u la kren ia kane.
Katkum ka jingiathuh u Conrad, u Myntri ka sorkar Assam u Piyush Hazarika, u la ong ba ka jingkren ka KSA kam iahap bad kam sngewtynnad. Ha ka jingshisha ka thong jong kane ka Committee ka long ban wanrah ia ka shongsuk shongshngain hapdeng ki ar tylli ki jaidbynriew bad ban wad ia ki lad lynti ban weng ia ki jingeh haba iadei bad ki jaka khappud.
Haba iadei bad ka jinglong jingman ha katei ka jaka, u Myntri Rangbah u la iathuh ba ka la pynkhlain ia ki bor pulit na bynta ban peit pyrman bha khnang ba kan nym don kano kano ka jingpynkhein ia ka ain bad ki pulit ka district ki la pynlong ruh ia ka jingiaid tawiar man ka por ha ki jaka khappud.
U Myntri Rangbah u la iathuh ruh ba na ka por sha ka por ka ju don ka jingiakren ba khah khah bad ka sorkar Assam khnang ban pyntikna ba kan nym don ka jingthut ha ka shongsuk shongshngain.
La ong ba dang shen u Myntri Rangbah ka Assam bad u CEM ka Karbi Anglong ki wan ban don bynta ha ka prokram ba long ha nongbah Shillong bad ki la shim ia ka jingiakynduh kum ka kabu ban iakren halor ka ishu Khanduli bad ha kane ka jingialang la iakren bad la shim ia ki katto katne ki rai bad ia kine ki rai yn sa rah ban iakren ha ka jingialang ka ban sa long biang ha u bnai Risaw hadien ba ladep jurip ia ki jaka ha Khanduli ban iakynduh ia ki nongshong shnong.
