Shillong, Nohprah 19: U nongialam ka liang pyrshah u Dr Mukul Sangma mynta ka sngi lyngba ka Twitter u la kynnoh ba ka long ka jinglehrain ia ka sorkar u Conrad Sangma ba kala pyndon kam bakla ia ka kyndon 144 CrPC ha kaba ia dei bad ka jingiakhih ki nongtrei ka GHADC ban dawa ia ka tulop jong ki kaba ki khlem pat ioh mynta la 32 bnai.
U nongialam ka liang pyrshah u la ong ba kane ka jingleh ka dei ka jingkhang lat ia ka hok jong, u la kynnoh ruh ba kane ka jingleh ka pyni ba ki nongialam ki bym Don bud lum.
U Deputy Commissioner jong ka West Garo Hills District ha ka jingpynjari ia ka kyndon 144 CrPC u la ong ba la ioh jingtip ba ki nongtrei ka GHADC ha ka nongialam jong ka kynhun Non Gazette Employees Association kila pynlong ia ka jingiakhih jong ki ha ophis jong ka GHADC, Hawakhana Tura.
Ka jingbit kaba la aisa ka long tang ha ka 14/12/2020 ba ki dei ban but ryntih ia ki kyndon ka MHA bad ka tnad ka koit ka khiah jong ka sorkar pdeng haba iadei bad ka jingiada na ka jingsaphriang u COVID-19.
Wat la ia ka jingbit ym shym la aisa, hynrei ki dang iai bteng ia ka jingiakhih jong ki bad kane kila pynkhein ia ki kyndon haba ia dei bad ka COVID-19 da kaba bteng ia ka jingiakhih jong ki ha ophis trei kam jong ka GHADC. La kdew ruh kat kum ka rai jong ka High Court ka Jylla Meghalaya 2016 la khang ba kun ia khih bad ba kin ia pynbeit da ka jingia sngewthuh.
Ban khanglat ia kano kano ka jingklumar kaba lah ban mih, naka liang jong u DC u la long ba la hal ban pynjari ia ka kyndon 144 CrPC bad kat kum ka kyndon kaba lai jong ka Meghalaya Epidemic Disease, COVID-19 Regulations, 2020.
Kumta la khang pyrshah ia ka jingialum briew palat ia ka sang ngut ha saw song ka ophis jong ka GHADC, Hawakhana Tura, la khang ba ymbit ban khang lynti ia ki ophisar bad ia ki kali ba leit bad mih trei, la khang pyrshah ia ki briew ban leit sha GHADC ban pynlong ia ki jingiakhih bad la khang ia baroh ba ym bit ban raha kino kino ki tiar pynsaw.
Kane ka hukum kan nym trei kam na ka bynta ki pulit kiba Don ha ka kam kane ka jingpynjari ia ka kyndon 144 CrPC kan trei kam ha baroh ki bynta ka ophis jong ka GHADC, kane ka long kay kum ha jingpynjari U DC ka West Garo Hills District.
