Shillong, Nailur 19: Ka Special Review Committee (SRC) kaba la thaw da ka sorkar jylla ban ia bishar bniah halor ka bill kaba la wanrah da ka sorkar pdeng ban pynkylla ia ka Sixth Schedule kala ia shong nyngkong mynta ka sngi hapoh ka jingpyniaid jong u myntri ba dei peit ia ka District Council, u James K Sangma.
Haba kren ha ki lad pathai khubor ha dien ka jingiakynduh, na ka liang jong u myntri u la ong ba na ka liang jong ka SRC kan dang ia kynduh biang ha ka 26 tarik mynta u bnai ha kane ka taiew ban wan ban dang iai beteng shuh ia kane ka jingkren halor kane ka juh kaphang.
Na ka liang jongu myntri u la iathuh ba kila ia kren ha kane ka jingiakynduh mynta ka sngi halor ka bynta kaba la don ha ka Bill kaba la wanrah da ka sorkar pdeng ban thung MDC ia ki jaid bynriew rileum kiba khlem don nongmihkhmat ha ka ktien nongwei ki ong “Unrepresented Tribes” ia kane ki dang iai bteng biang ban ia kren ha ka jingkynduh ha kane ka taiew ban wan.
Haba jubab ia ki jingkylli halor ka jingpynbna jong u President 1950, na ka liang jong u myntri kane ka dei da kawei pat ka phang ka bym don jingiadei ei ei ruh em bad kaei kaba kane ka jingthmu ban pynkylla ia ka Sixth Schedule.
U bah Samuel B Jyrwa, ba mih khmat na ka liang jong ki riew paidbah sha kane ka SRC, u la ong ba kin dang ia kynduh biang ha ka sngi Palei ban wan kata ka 26 tarik mynta u bnai. Na ka liang jong ki la pynpaw ia ka jingsngew ha kaba ia dei bad ka jingong ban thung MDC ia ki jaidbynriew kiba khlem don nongmih khmat.
Kawei pat ka long halor ka Village Council, Municipal Council, na ka liang jong u Bah Samuel u ka ong ba wat la ha ka Bill kala don ba kitei kin nym trei kam ha ka jylla Meghalaya, hynrei ka don pat ka ktien kaba ong kane kan long tad haduh ban da pynbna pat da u Lat jong ka jylla.
Haba ia dei bad ka jingjied ia ki rangbah shnong, na ka liang jong kila pynpaw ba kane kam dei ban hap hapoh jong ka State Election Commission, hynrei dei ban leh lyngba jong ki District, u la ong ba kin sa dang ia kren biang ia kane ka kam ha ka 26 tarik mynta u bnai.
Ki dkhot jong kane ka SRC, nalor u myntri ba dei u Langphang kane ka kommiti, kiwei ki dkhot kiba la ia poi sha kane ka jingiakynduh kaba myntkong ki long ki CEM na ki lai tylli ki District Council, u Bah Vincent H Pala MP jong ka Shillong Parliamentary Konstitwensi, u myntri kam pynroi sor bad ki dkhot na ka kynhun riew paidbah, u Bah Samuel B Jyrwa bad kiwei.
