Shillong, Risaw 13: Mynta ka sngi ka ‘Ka Sur Ki Paidbah ka Bri Hynniewtrep” kala pynlong ia ka jingiakhih shnong kyllain mongor ha Madan Malki ha kane ka sngi ba dap ar bnai ka jingkhlad u bah Cheristerfield Thangkhiew ha ka jingshah siat iap ki pulit ha iing sah jong u ha Mawlai.
Ha kane ka jingiakhih shong kyllain mongor ki nongkren baroh ki pynpaw ia kawei ka jigndawa ba ka sorkar ka dei ban saspon lane weng kam shipor ia ki lai ngut ki pulit kiba suba ba don kti ha ka jingsait iap ia u bah Cheris ha kum kane ka sngi ar bnai mynshuwa.
U bah G Kharraswai haba kren ha kane ka jingiakhih shong kyllain mongor u la ong ba dei kane ka sorkar kaba la lah ban wanrah ia u bah Cheris na Bangladesh ha u snem 2018 ba un wan pyndem ban im noh ka jingim kaba long lem kum kiwei ki para nongshong shnong.
Hynrei ka long kaba sngewsih ba ei ha kane ka juh ka sorkar kaba la dkhat ia ka jingim jong u da ki pulit, ka jingkylli ka long balei ka sorkar kam nud ban weng kam shipor ia ki lai ngut ki pulit kiba la suba ba don kti ha ka jingsiat iap ia u bah Cheris.
Ka jingdawa jong ki ban weng kam shipor ia ki lai ngut ki pulit ka long ban ioh ia ka jingbishar kaba khuid kaba suba namar lada ki dang don ha ka bor kumno yn tohkit iaki ha kaba ia dei bad kane ka jignshah siat u bah Cheris.
Kane ka jingleh jong ka sorkar ka dang pynbitar ia ki paidbah bad khamtam ia ki khun samla, la ong ba lada ki pulit kila lah ban kem ia kita kiba buh bom ha khmat ophis ka NPP, balei ki pulit kim lah ban kem ia u Vicky Dey bala krem bein ia ki nongialam ka jylla haba kren kumta kam dei ba ki kwah ban pyniapher jaidbynriew hynrei dei ka jingleh ki pulit.
Ha ka jingkren u bah Marbud Dkhar u la ong ba lada ka sorkar kam sngap ia ka jingdawa ka Ka Sur Ki Paidbah ka Bri Hynniewtrep, kum ka kynhun kan dang pynjur shuh shuh ia ka jingiakhih bad kim pynlong da ka jingiakhih kaba kynsan ban pynbor ia ka sorkar ban seng kam shipor ia ki pulit.
Kiwei kiba la kren ha kane ka jingiakhih shong kyllain mongor ki dei long u bah P.G Lapang na Ri Bhoi, bah D.Sunn na West Khasi Hills. Hakane ka sngi kiba la ia poi sha kane ka jingiakhih shong kyllain mongor ki long na kylleng ki bynta jong ka Ri Lum khasi kiba kynthup ia ki long kpa, ki long kmie bad khun samla.
