Shillong, Nailar 27: U Bah Pius Marwein MLA ba thymmai jong ka Ranikor Konstituwensi haba kren ha ki lad pathai khubor mynta ka sngi ha dien ba la pynbna ba u la long u nongjop ha kane ka elekshon shiteng samoi u la ong ba ka thong kaba ha khmat eh ka jong u dei ka Surok.
U Bah Pius u la ong ba “Na ka liang jong nga haba nga phai sha ka dong ka thain jong ka Ranikor Konstitwensi, ha ki jingkyrpad ki jong nga ha kane ka eleskhon kaba la dep bad mynta ruh ka kynti ruh nga kwah ban mih ia kane ka kam ka long ban kit ia ka khia ka shon jong ka Ranikor”.
U la ong ba lada phai sha ka Ranikor Konstitwensi u iohi shibun ki jingduna ha baroh ki liang lehse, phai ha ka liang jong ki surok, phai ha ka liang jong ki jaka sumar, phai ha ka liang ka umbam umdih, phai ha ki jaka pule puthi bad ha bun ki liang.
U MLA ba thymmai ka Ranikor u la ong “Hynrei ka jingkular ka jong nga ka long ba yn da nga poi sha ka thong ryngkat ngin ia trei lang ban ia weng ia kita ki jingeh katba ngi lah”.
Ka jingeh kaba ha khmat eh ka dei ka surok, kumba phi tip ka surok ka dei ka bud lum jong ka ioh ka kot, ka surok hapoh jong ka Ranikor ka dang sah dien ha bun ki liang. Lada phai ha ka pule puthi ruh dang sah dien namar ha duh mynta ym pat don wat tang kawei ka Kolej ruh.
Lada ngi phai ha ka jaka sumar ruh ka don tang kawei ka CHC ha Ranikor ar tylli ki PHC kine ruh kim trei kam. Na ka liang jong nga, nga kwah ba kine ki mat kiba ha khmat kiba nga kwah ban leh.
