Shillong, Jymmang 24:Kum shi bynta ban iada bad ban pynduna ia ki khun samla ki ba la ngop ba kyrni ha ka jingdih Duma, ka State Nadal Officer jong National tobacco programme ka jylla Meghalaya ka Dr Lana lyngdoh Nongbri ka la ong ba ka jylla Meghalaya ka long ka jylla ka ba rit bha katba ka wan ba nyngkong ha ka jingbun ki nong pyndonkam ia u Duma.
Haba iakren bad ki nongthoh khubor ha shillong press clubs ka la ong ba ka la kiew stet bha ka jingbun ki briew ki ba pyndonkam ia u Duma ha ka jylla Meghalaya, ka la ong ruh ba kane ka jingbun ki nongpyndonkam ia u Duma ka buh jingma shibun ha ka ba iadei bad ka koit ka khiah bad kaba ktah shibun ia ki khyllung khynnah ki ba dang dei ka por ban heh ban san.
Ka la ong ba na ka liang kane ka tnad kan sa pynlong ia ka jingrakhe ia ka World’s No Tabacco Day kaba sa long ha ka 31 tarik Jymmang 2023, ha katei ka jingrakhe la buh ia ka phang pdeng kaba dei “My Meghalaya – Tobacco Free Meghalaya”.
Ha kajuh ka por ka Dr Lana Lyngdoh Nongbri ka la kyntu ia baroh ki skull lane ki jaka ai jingnang jingstad ba kin ia shimbynta halor ban pynsngewthuh paitbah ia ka jingma jong ka jingdih Duma, da ka ban pynlong ia ka jingiaid rally ban pynshai ba ka jingdih Duma ka buh jingma ia ka koid ka khiah u briew.
