Shillong, Nailar 03: Ka United Hynñiewtrep Movement (UHM) Central Executive Council ka dap da ka mynsiem jingbitar hadien ba ka lah ioh ia ka jingujor na ki nongshong dukan kiba shong ha ka jaka ba hap hapoh ka Forest Department kata ha Hynñiewmer.
Haba ka seng kala ia shong bad sngap thuh ia ka jingshem lanot bad ka jingshah ñiew beiñ jong kine ki nongshong dukan kiba im da kaba kamai mynstep bam da miet, ba ha ka por ba ka wan ka khlam Covid 19 ia kane ka jaka lah ai sngewbha da ka Forest Department ban pynlong iew ban dei ia ki mar rep bad kumjuh ruh kiwei kiwei ki kam kiba iadei bad ki mar bam mar dih.
Te hadien ba na ka liang kine ki paradoh parasnam ki lah ioh jaka hangne kim banse ban pyllait noh ia ki dukan jongki ba ki shong baroh shi katta namar ba ka shem jingeh ban pynmih bai wai khlem da ioh plie ia ki dukan ki jongki ha kato ka por ka khlam Covid 19, hynrei da ka mynsiem ba kmen ki lah ioh jingkyrmen lyngba ka jingioh lad ban shong ha kane ka iew ba dei ka jaka jong ka Forest.
Hynrei kaba pynsngewsih ia ki pat ka long ba shu syndet syndet khlem kano kano ka jingthoh na ka liang ka Forest Department ki shu byrngem beit ban rat naphang ia ki dukan kiba ker dara hangto.
Ka jingkylli kaba ka seng ka buh ia ka Forest Department ba ka jingmut aiu ban buh ia kato ka jaka hangto kaba shu long thylli ha ka jingshisha ka dei ban ailad khamtam haba ki paradoh parasnam jongngi ki ioh ban kamai jakpoh nangto khamtam ha kum kane ka por ba ka jingkyrduh kam kyrduh jam jong ki paid ka bri ka lah jur shaba palat.
Na ka liang ka seng da lei lei ka seng kan nym ailad ia kum kine ki jingleh donbor jong ka sorkar ia la ki jong ki paradoh parasnam jong ka bri u Hynñiewtrep Hynñiewskum jongngi.
ka seng lyngba une u kyrwoh kada maham tyngeh ia ka Forest Department ba kam dei ban leh donbor kumne ia kine ki nongshong dukan hangne bad lada ka don ka jingthmu ban shna ne leh eiei ia kane ka jaka katkum ka jingdonkam jong ka department kan hap ban pynioh jaka ia kine ki nongshong dukan hangne kata ruh kaba long ka jaka kaba paka lym kumta ka seng kan sa shim da ki sienjam ba tyngeh.
Ka seng ka buh ruh ka jingkylli ia ka Forest Department ba kadei ban kyndang noh mardor ia ka ïingmane blei jong kiwei pat ki niam ba la pynieng be-aiñ ha ka jaka jong ka kata ka Mahadev Khola bad kumjuh ruh kiwei kiwei ki jaka ba lah tei be-aiñ ha ki jaka jong kane ka department.
Ka seng kan saw at da ka RTI ia kiba bun ki jaka jong ka forest bad lada ka lap ba don ki jingpyndonkam bakla ia ki jaka jong ka da kino kino ki riew shimet ka seng kam banse ban hap shim da ki sienjam ba tyngeh kata da ki jingiakhih bad wat kat haduh ban da poi shaduh sha High Court, la ong u bah Charlie Rani President bad u bah Teibor Shadap General Secretary ka seng UHM.
