Shillong, Rymphang 17: Ka tnad kam jain jong ka Sorkar Meghalaya ka la ioh khusnam bad jingithuh lyngba ka KHUSNAM BA KYRPANG hapoh ki khusnam Textiles Sustainability Awards da ka Confederation of Indian Textile Industries (CITI) kaba long bad ka Bharat Tex 2025 Global Textiles Expo, ba la pynlong da ka tnad Kam Jain ha Bharat Mandapam, New Delhi da ka jingpeit bniah ia ki kam jain, ka jingiaineh bad ka riam ka beit.
La pyntip da u Secretary General jong ka CITI, ba ka kynhun nongbishar, “Ka la itynnadbha ia ki sienjam jong ka tnad kam pynmih jain jong ka Sorkar Meghalaya na ka bynta ka jingkhyllie ia ka jinghiar pateng ka kam pynmih jain.”
Kumba la pyntip da ka CITI, ka khusnam Textiles Heritage Reviver Award da ka CITI – Alekh ka la pynkup burom ia ki briew bad ki kynhun na ka bynta ki sienjam ba la shim ban khyllie ia ka jinghiar pateng ka rukom pynmih jain tynrai, ka jingkyntiew ia ka jingiaineh, ka jingwanrah ia ka jingsaindur thymmai bad ka jingpynkupbor ia ka imlang sahlang lyngba ki jingnohsynniang sha kane ka kam.”
U Bah Frederick Roy Kharkongor, Principal Secretary, ka tnad kam jain Meghalaya, u la ioh pdiang ia ka khusnam ba Kyrpang na ka liang jong ka jylla bad ka tnad, kaba la ai da u PabitraMargherita, Myntri Khynnah ka tnad Kam Jain jong ka Sorkar India, ki ophisar ka tnad Kam Jain jong ka India, Chairman CITI bad kiwei kiwei ki kynrem ki lyndan ha ka 17 tarik u Rymphang kum shi bynta ki khusnam CITI Textiles Sustainability Awards 2024-25 ha Bharat Mandapam, ha ka sngi ba kut jong ka bynta kaba ar jong ka Bharat Tex Global Textiles Expo 2025.
Kiwei kiwei ki mat ba kongsan jong ka prokram ki kynthup ia ka jinpyni ia ki rukom treikam ba biang tam jong kiba jop khusnam bad ka Earth loom -Threads of Heritage – ka prokram pyni riam kaba rakhe ia ki rukom thain jain ba iaineh jong ka India bad ki riam jong ki nongsaindur ia ki riam na kylleng ka ri ba kynthup ruh ia ka jylla Meghalaya
Hapdeng ki sienjam ba la shim da ka tnad kam jain naduh u snem 2019, ki mat ba kongsan ki kynthup ka jingpyntip bad ka jingai jingithuh ia ka shnong Umden -Diwon ha Ri Bhoi district kum ka ERI Silk village ba nyngkong jong ka Meghalaya ha u snem 2021, ka jingsdang ia ka Design Innovation Research Centre, (DIRC) ha u snem 2022.
Kaba pyni ia baroh ki kam kiba iadei bad ka Ryndia naduh ki jaka ri ia ki khniangsairusom haduh ka jingpynmih ia ka jain, u ksai sha ka jain, ka jain sha ka riam, ia ki briew, ka jingkyntiew ia ka Ryndia brand, ka jingpyrshang ban ioh GI tag ia ka Ryndia, ka jingsdang ia ka Eri Corner ha ka Megh Tex, ka jingpynioh ia ka Silk Samagra prokram ban ai jingkyrshan ia ki nongriia ki khniangsairusom, ka jingpyniaid ia ka Integrated Textile Tourism Project ka ban wan ha Nongpoh.
Ka jingwanrah ia ka rynsan e-portal na ka bynta ka Ryndia, ka jingai jingkyrshan ia ki prokram na ka bynta ki kynhun nongthain jain, ka jingai jinghikai bad ka jingkyntiew ia ka bor treikam ha ki rukom saindur ba thymmai, ka jingbuh jingtip lyngba ka Woven Narratives, ka jingpyni ia ki jain tynrai ha ki exhibition hapoh ka ri bad shabar ka ri, Dubai Expo, International Sericulture Commission, (ISC) Romana, Silk ha Lyon, France 2022, G20 Craft Bazar, Italy, Vietnam 2023.
Bharat Tex Global Expo 2024 bad ka jingai jingkyrshan na ka por sha ka por ia ki jaka pynmih jain bad ki nongsaindur ba seng kam lajong ba kin iashim bynta bad pyni ia ki jingsaindur jong ki, kaba kyntiew ia ka jingpaw ki jain tynrai jong ka jylla kiba thain da ka kti, ki bym ktah ia ka mariang, kiba ai da ki rong ba ioh na ka mariang, kiba pyniaid da ki longkmie, kiba la pynioh ha ki rukom ba don jingbahkhlieh bad ba long organic naduh ki ksai haduh ki jain
Ka tnad, ki briew ba don bynta ha kane ka kam bad ki nongiatreilang kiba don ka juh ka jingmut ki bteng ban kyrshan ia ki kam bad ki prokram kiba ai mynsiem bad kyntiew ia ki jainRyndia jong ka jylla, ha ryngkat kiwei kiwei ki jain tynrai kaba iahap bha bad ka jingkyntiew ia ki kam jain jong ka jylla kaba dang bteng ban long ka dak jong ka jingpynneh ia ka dustur, ka jingplie lad kamaijakpoh, bad ka jinglong jingman kaba khlain jong ka mynsiem ba shlur bad ka jingtbit jong ki longkmie jong ka jylla kiba thain jain bad bad pynmih tiar.
