Shillong, Nailur 30: Ka seng lehnoh HNLC kala buh ia ka jingkylli ia ka sorkar, kaei ka jingpyntikna baka Sorkar kan ai iaka HNLC hadien ka jingpyndem bad sa iakren? .
Haka kyrwoh kaba la phah da u publicity Secretary ka seng HNLC u Bah Sainkupar Nongtraw u la ong “Ngi iohi ba hadien ba ka ANVC ka lah dep pyndem lut iaki tiar ialeh bad kumjuh ban pynduh iaka Seng jong ki hynrei kaba sngew thamula ka long ba ka “Agreed Text for Settlement” kaba lah ia soi haka 24 september, 2014 ka shu kut tang haki jingkular ka Sorkar wat hadien 4 snem tam”.
Kane ka dei tang ka jing shah pynthame bad ka jing shahialam bakla ki nongialam ka ANVC haka buit ka Sorkar jylla bad ka Sorkar kmie. Shuh shuh ki iohi ba ka jingpyndem wait ki sengkiengatiar kiba mih kum ki sengtit ha rilum garo kiba shu leit pyndem khlem kano kano ka jingiakren ruh ki shu kut tang haka jingpyndem hi.
U publicity secretary ka seng HNLC u la ong ba “Ngi kloi ban wan pyndem lada ka Sorkar ka lah ban kynthup iaka mat jong kata ka bor ba hakhliehduh haka jingiakren iasuk, ka jingsuk hi kam shym mut tang ha bym don ka jingiaumsnam hynrei ka mut eh ban lait naka jing shahteh shahkhum laka long haka ioh ka kot, ka imlang sahlang ne ka synshar khaddar”.
Ka jingialeh ka HNLC ka long ba kim kwah iaka jylla kaba hap hapoh ka ri India hynrei ki kwah ban im laka jong. Ka HNLC ka kyntu jur ia u Conrad Sangma ba ai un iehnoh iaka Khasi-Jaiñtia kaba dei ka bynta jong ka Jaidbynriew bad un ialeh laka jong ka jylla ki Garo ka ban hap hapoh ka ri India kumba ki paid Garo bad u kpa jong u u Purno A Sangma u angnud.
Kumba ka long mynta ka Jaidbynriew Garo bad ka bri u Hynñiewtrep ki lah dep long lypa laka jong haka kyrdan ka barit bad kaba pohtam, Lada bishar haka jingdon jong ka ‘Reservation system’ ha India, na bynta ki STs, SCs, OBCs bad BC(M) ka lah pynlong lypa iaki Jaidbynriew ritpaid ba kin long laka jong.
Lada kren kyrpang tang iaki STs, ka jingbuh bhah kaba kynthup lang iaka Jaidbynriew haka liang ka iohkam iohjam, ka jingbuh bhah haka jingpule puthi, ka jingbuh bhah haka jingjied iaki nongmihkhmat sha ka Parliament ter ter, lada kheinlang ia kine baroh ki long tang kumba 3℅ naka 100% ka leit sha ka Jaidbynriew Hynñiewtrep khlem da ailad ban iohlang iakata ka kajuh ka kabu kaba long iaryngkat bad kiwei pat ki hehpaid ha Ri India.
Wat ha ka durbar bah ka UN ki ri kiba heh ne ki barit ki ialong ha kajuh ka kyrdan lyngba ka ‘One Nation, One Vote’ khlem da khein iaka jinghehpaid ne jingrit paid ki ri. Ym tang katta la shem baka jingkhein iaki STs kum ki ‘second-class citizens’ ka long sa kawei pat ka jingshah niewpoh kumba ki la hap shabar jong ka jingsynshar.
Ka jingpyrshang ka Sorkar India naka por sha ka por ban pynlong noh iaka Municipal Election ka dei tang ka jingpynbor ban ia long kawei hapoh ka India. Halor kine kiei kiei ka HNLC ka sngew ba ka bor hakhliehduh ka dei kaba kongsan tam, khnang ba ka Jaidbynriew kan ioh laitim.
Haka jaka ban kyntiew shalor iala u jong u paradoh parasnam, la ialeh pynban ban tan ia u shapoh nalor ba ka seng UDP lei kat haduh mynta mynne hi kam pat lah ban pynmih wat tang ia uwei u MP na Meghalaya. Khlem artatien ka jingbym iatylli ki seng riewlum. Kane ka long ka kyrwoh kaba la phah da u bah Sainkupar Nongtraw publicity secretary ka seng lehnoh bala shah niew beain ka HNLC.
