Shillong, Nailar 05: U MLA ka Mairang Constituency, Bah Metbah Lyngdoh uba dei ruh u Lamphang ka Ïing Dorbar Thawain ka Jylla u la ban jur ba halor ka injek ïada COVID-19 kam don kano kano ka jingpynbor lada ki paidbah kim mon ban ai.
Ia kane u Bah Metbah u la pynpaw haba kren ha jingialang aiti ia ka Ambulance sha ka Dongki Ingding PHC ha ka 05 tarik u Nailar, 2021 ia kaba u la lah ban pynioh na u Myntri Rangbah ka Jylla, Conrad K Sangma na kiba la ïoh pdiang na ka Company National Highway Infrastructure Development Corporation Limited (NHIDCL).
“Hynrei ngi don ha ka imlang sahlang kaba ngi hap ban don ka jingkitkhlieh lang ym tang ialade hynrei na ka bynta kiwei ruh kumjuh. Ka thaiñ Dongki Ingding bad ka Laitdom ki dei kiba duna bha ha ka jingwan sha khmat ki paidbah ban shim injek ïada COVID-19 bad kiwei ki jaka ki la wan sha khmat ban shim injek ïada COVID-19”, u la ong.
U la ong ba hap ban pynjari da kaba khang ia ka jingmih jingrung ki briew ha Pyndemumiong ha ki sngi ba la dep namar ka jingkiew sted ka khlam COVID-19. “Hap ban pyndkut ia u kynjri jingpur kane ka khlam. Ngim dei ban shim sting ia kane bad ngi ïohi ia ka jingbun ki ba ioh pang COVID-19 ha nongbah Shillong”, u la ong.
“Bun ki doctor kiba nga la iakren halor ka injek ïada COVID-19 bad ki la pynsngewthuh. Mynshwa ym don ba kwah ban shim dawai Polio hynrei hadien ki la shim da ka jingsngewthuh. Kum ki nongialam ka Jylla ngim ïohi ba ki briew kin duh ia ka mynsiem ka jong ki”, u la ong.
U la ong ba kiba ïoh pang COVID-19 ha West Khasi Hills ki don kumba 500 tam. “Ka Mairang Block ka dei kaba kiew sted bha ha ka jingdon kiba bit jingpang COVID-19. Nga la ia kren bad ki bor pyniaid ka Civil Sub-Division bad la ïoh jingtip ba iwei hynne ka step i la khlad na kane ka jingpang na ka daw ka jingslem ban wan phah sumar”, u la ong.
U la ong ba bun, katkum ka kaiphod, kiba khlad na kane ka jingpang ki dei ki bym pat ai injek ïada COVID-19. “Kane kan long kaei kaei kaba ngi kum ki nongshong shnong ngi hap ban shim ia ka jingkitkhlieh halade marwei marwei”, u la ong da kaba kyntu ia ki briew ba kin ym shah pynsngewthuh bakla da ki khubor ki bym don nongrim halor ka injek ïada COVID-19.
“Ka Sorkar kan ym leh kano kano ka kam ban wahrah jingjynjar ia ki briew bad shu lah ban don katto katne ne iwei ar kiba khlad hadien ha ai injek bad ym dei baroh”, u la ong. ” 11 lak tam kiba la ai injek ïada COVID-19 bad kumta nga kyntu jur ba ki nongialam shnong ba kin pynshai bad shim lem ka bynta jong ki ban pynshai sha ki paidbah”, u la ong.
Halor ka Ambulance, u la ong ba kane kan long ka jingiarap ia ki paidbah nongshong shnong kiba donkam. U la ong ba kum ki briew donkam ban kit ia kiba pang ba shitom ban ïoh jingsumar na ki hospital kiba la kham biang. U la ai khublei ia ka ophis u Myntri Rangbah kaba tang shu ïakren la ïoh ia kane ka Ambulance.
U la ong ba ka jingdon ka khlam COVID-19 ka la pynthut ia ki jingtreikam ban kyntiew ia ka roi. U la ong ba u kwah ban kyntiew lang ia ki shnong ki thaw ha ka liang baroh. “Ka jingai mynsiem ki doctor ki nurse ia ki nongpang ka long kaba donkam bha haduh katta katta”, u la ong.
Kiwei kiwei kiba la iadonlang ha kane ka jingialang pyllait paidbah ia ka Ambulance ki kynthup ia u Dr S Marweiñ, Medical Officer ka Dongki Ingding PHC, Dr AS Kharphuli, Ayush Physician, u Bah K Rapsang, Sordar ka Shnong Dongki Ingding, u Bah S Mawiong lem bad kiwei kiwei pat.
